З 3 верасня па 31 кастрычніка ў зале перыядычных выданняў (пам. 106) праходзіць тэматычная выстаўка “Наша зямля – наша багацце!”.
Зямля з’яўляецца асновай жыцця і дабрабыту народа. Яна асноўны прыродны рэсурс, матэрыяльная ўмова жыцця і дзейнасці людзей, база для размяшчэння і развіцця ўсіх галін народнай гаспадаркі, галоўны сродак вытворчасці ў сельскай гаспадарцы і істотная крыніца атрымання харчу. Мудрае, руплівае і клапатлівае стаўленне да зямлі, захаванне яе ўрадлівасці, разумнае выкарыстанне – наш абавязак перад сённяшнім і будучымі пакаленнямі.
Рэспубліка Беларусь – адна з нешматлікіх краін былога Савецкага Саюза, якая зрабіла стаўку на развіццё сельскай гаспадаркі, захаваўшы тым самым самабытнасць свайго працавітага народа і пашану разважных людзей.
Сёння ўмацаванню аграрнай эканомікі можа спрыяць павышэнне эфектыўнасці выкарыстання ўнутраных рэзерваў. Задзейнічаць рэзервовыя магчымасці здольны інавацыі. Якія яны, асноўныя напрамкі інавацыйнага развіцця земляробчай галіны Беларусі? Пра гэта і многае іншае раскажуць прадстаўленыя на выстаўцы артыкулы з часопісаў “Зямля Беларусі”, “Агропанорама”, “Беларуская сельская гаспадарка”, “Наша сельская гаспадарка”, “Земляробства і ахова раслін” і інш.
Адзін з блокаў экспазіцыі прысвечаны тым, хто захоплены загарадным жыццём. Цікавасць выкліча падборка матэрыялаў з папулярных ілюстраваных часопісаў “Родная прырода”, “Хозяин”, “Сад и огород”, “Домашние цветы”, “Наша усадьба”, “Приусадебное хозяйство”, у якіх прадстаўлены шматлікія публікацыі пра сучасныя тэхналогіі і народны вопыт догляду саду, кветніка, грады з агароднінай і інш.
Усяго экспазіцыя налічвае звыш 40 перыядычных выданняў.
Кантактны тэлефон: (8 017) 293 25 87.
 |
 |
 |
 |
