З 4 ліпеня па 30 жніўня ў зале беларускай літаратуры (пам. 205) праходзіць выстаўка “Праз прызму стагоддзяў да будучыні”, на якой прадстаўлены гісторыка-прыгодніцкія, дэтэктыўныя і фантастычныя творы беларускіх пісьменнікаў.
Без перабольшання можна сказаць, што прыгодніцкую, дэтэктыўную і фантастычную літаратуру любяць усе. Сёння яна стала асабліва папулярнай. Экспазіцыя знаёміць чытачоў з лепшымі выданнямі гэтых жанраў. Тут і вострасюжэтныя творы, якія апавядаюць пра даўно мінулыя часы, і творы пра касмічныя падарожжы і незнаёмыя цывілізацыі, і пра раскрыццё жорсткіх злачынстваў і таленавітых следчых.
На тэматычная кніжная выстаўцы прадстаўлены гісторыка-прыгодніцкія раманы У. Караткевіча, У. Арлова, В. Іпатавай, Л. Дайнекі, К. Тарасава, Ю. Татарынава і інш. Іх творы захапляюць сюжэтам і высакароднасцю герояў.
Здольнасць да фантазіі – адна з найважнейшых уласцівасцей чалавека, бо фантазія спрыяе духоўнаму руху, мастацкай і тэхнічнай творчасці, дапамагае спасцігнуць наш свет. Экспазіцыя знаёміць з вытокамі фантастычнага жанру, які прысутнічаў у беларускай літаратуры з даўніх часоў, бо звязаны з фальклорам і вераваннямі беларусаў (Я. Баршчэўскі “Шляхціч Завальня, або Беларусь у фантастычных апавяданнях”); разглядае развіццё фантастычнага жанру ад навукова-фантастычных раманаў У. Шыціка і М. Гамолкі да рамана-фэнтэзі Н. Ракіцінай і кіберпанка А. Паўлухіна. У сваіх творах пісьменнікі падымаюць злабадзённыя праблемы, адлюстроўваюць перспектывы духоўнага і навукова-тэхнічнага развіцця чалавецтва. І цікавасць да гэтага жанру літаратуры расце, бо, як адзначае С. Мінскевіч, “калі на мове народа ствараецца навуковая фантастыка, то народ мае будучыню”.
У параўнанні з іншымі жанрамі дэтэктыў у беларускай літаратуры з’явіўся пазней – у канцы ХХ ст. Этапным момантам для яго станаўлення сталі творы У. Караткевіча “Дзікае паляванне караля Стаха”, “Чорны замак Альшанскі”. Таксама на выстаўцы прадстаўлены творы М. Адамчыка, М. Чаргінца, М. Клімковіча, С. Трахімёнка, В. Праўдзіхіна, І. Воранава і інш.
Выклікае цікавасць раздзел выстаўкі, прысвечаны дзіцячай прыгодніцкай літаратуры. Тут экспануюцца творы Я. Маўра, П. Місько, М. Чарняўскага, Э. Скобелева, Д. Вінаградава і інш.
Асобная частка экспазіцыі знаёміць з публікацыямі ў навуковых зборніках і часопісах, прысвечанымі развіццю беларускай фантастыкі, нацыянальнага дэтэктыва, гістарычнай прозы.
Экспазіцыя налічвае каля 320 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
 |
 |
 |
 |
 |
 |
