З 19 ліпеня па 15 жніўня ў зале беларускай літаратуры (пам. 205) праходзіць выстаўка “Сталасць даследчыцкай думкі”, прысвечаная 75-годдзю Вячаслава Антонавіча Чамярыцкага.
Літаратуразнавец, крытык, тэкстолаг, перакладчык, лаўрэат Дзяржаўнай прэміі Беларусі (1994) В. А. Чамярыцкі даследуе пісьмовую спадчыну Беларусі ад часоў полацкай князёўны Рагнеды і аж да ХVIII ст. Яго стыль вызначаецца дакладнасцю аргументацыі, пераканаўчасцю вывадаў, прастатой і выразнасцю, сцісласцю і важкасцю выкладу. Ён унёс значны ўклад у вывучэнне беларускага летапісання.
У першым раздзеле выстаўкі “Зачараваны беларускім летапісаннем” прадстаўлены асноўныя працы літаратуразнаўца: манаграфія “Беларускія летапісы як помнікі літаратуры” (1969), кніга “Францыск Скарына” (у сааўтарстве з Г. Галенчанкам і В. Шматавым), якая выдадзена на французскай і англійскай мовах (1979, 1980), а таксама праца “Беларускі тытан эпохі Адраджэння” (1990), прысвечаная 500-годдзю з дня нараджэння Францыска Скарыны. Вячаслаў Чамярыцкі – адзін з аўтараў калектыўных прац “Гісторыя беларускай дакастрычніцкай літаратуры” (1968, т. 1), “История белорусской дооктябрьской литературы” (1977), “История всемирной литературы” (1985, т. 3; 1987, т. 4), падручніка для ВНУ “Гісторыя беларускай літаратуры. Старажытны перыяд” (1985, 1996), “Анталогія даўняй беларускай літаратуры” (2003, 2005) і інш.
Значнае месца ў творчасці пісьменніка займае перакладчыцкая дзейнасць. Ён выступае як папулярызатар пісьмовай спадчыны беларускага народа і перакладчык твораў старажытнай літаратуры на сучасную беларускую мову. У раздзеле выстаўкі “Майстэрства перакладчыка, рэдактара, рэцэнзента” дэманструюцца яго шматлікія пераклады са старажытнарускай і старабеларускай моў. Вячаслаў Антонавіч Чамярыцкі прымаў актыўны ўдзел у выданні “Поўнага збору рускіх летапісаў” (т. 32,35). З’яўляецца складальнікам зборнікаў “Слова пра паход Ігаравы” (1986), “Сведкі беларускай мінуўшчыны” (1996), навуковым рэдактарам і аўтарам прадмовы да выдання “Беларускія летапісы і хронікі” (1997).
Раздзел “Дарога жыцця і творчасці” знаёміць з публікацыямі пра творчы шлях пісьменніка, змешчанымі ў энцыклапедыях, зборніках і часопісах.
Выстаўка ілюстравана фотаздымкамі Вячаслава Антонавіча.
Экспазіцыя змяшчае каля 80 дакументаў.
Кантактны тэлефон: 293-27-16.
 |
 |
 |
 |
