19 красавіка з 19.00 да 23.00 Нацыянальная бібліятэка Беларусі запрашае на “Бібліяноч-2024”!
Вучыцца, вучыцца і яшчэ раз вучыцца! Шумна, весела і крэатыўна пазнаваць нешта новае заклікае жыхароў і гасцей сталіцы “NLB. Планета ведаў” – галоўная бібліятэка краіны.
Пасля ўрачыстага старту ў цэнтральным холе бібліятэкі мноства тэматычных пляцовак з насычанай праграмай на любы ўзрост і густ будуць працаваць на працягу ўсёй “Бібліяночы”. Сумна і ціха ў бібліятэцы дакладна не будзе!
Усе жадаючыя змогуць паспрабаваць свае сілы ў актыўных квестах і пазнавальных квізах, шахматна-шашачных турнірах і настолках ад “HobbyGame”.
Для тых, хто вырашыць прысвяціць вечар вывучэнню чагосьці новага, распачнецца сапраўдны лекторый. Ведаў будзе вельмі шмат! Лекцыі адваката, псіхолага, астрапсіхолага, астролага і стыліста, майстар-класы па тэхніцы кітайскага жывапісу і графіцы, бачаце і сальсе, ігры на ханге, джэмбе і ўкулеле. А паказ мадэляў адзення беларускіх дызайнераў ад мадэльнага агенцтва “Wow Kids” акрэсліць трэнды сучаснай моды.
Нікога не пакінуць абыякавымі чароўныя галасы і жывая музыка фолк-гурта “Guda”, капэлы традыцыйнай музыкі “Анягож”, ансамбля салістаў “Te Deum”, хору “LoveMusicTeam” БДПУ і салістаў хору “Голас душы”.
Для маленькіх гасцей будзе працаваць пляцоўка “Дзеткі + Продкі”: тэатр, займальныя майстар-класы, гульнявыя праграмы, навуковае шоу і шмат іншых пазнавальных забаў. Цікава будзе не толькі дзецям!
У рамках “Бібліяночы” будуць працаваць бонусныя пляцоўкі, уваход – платны і па фішках. Фішкі можна атрымаць за актыўны ўдзел на пляцоўках.
Падрабязная праграма хутка! Сачыце за навінамі!
Уваход на мерапрыемства вольны!
Тэлефоны: (8 017) 368 37 37 (для даведак), (8 017) 293 27 56 (для СМІ).
Матэрыял пададзены аддзелам сувязей з грамадскасцю.
