26 красавіка ў Нацыянальнай бібліятэцы Беларусі ладзіліся мерапрыемствы, прымеркаваныя да Сусветнага дня кнігі і аўтарскага права, а таксама Міжнароднага дня інтэлектуальнай уласнасці.
Арганізатары – Нацыянальная бібліятэка Беларусі (НББ), Нацыянальны цэнтр інтэлектуальнай уласнасці (НЦІУ), Савет бібліятэк Беларусі па інфармацыйным узаемадзеянні.
У прэс-цэнтры Нацыянальнай бібліятэкі адбыўся навучальны семінар “Пытанні аўтарскага права” для прадстаўнікоў бібліятэк Рэспублікі Беларусь, у рамках якога былі асветлены пытанні нацыянальнай і міжнароднай сістэмы аўтарскага права, практычныя аспекты рэалізацыі ў дзейнасці бібліятэк Закона “Аб аўтарскім праве і сумежных правах”, міжнародны вопыт узаемадзеяння з аўтарамі. Навучанне прайшлі 70 прадстаўнікоў бібліятэк Беларусі. Па яго выніках выдадзены сертыфікаты.
У рамках культурна-асветніцкай акцыі “Крок у будучыню” вызначана лепшая бібліятэка нашай краіны ў галіне арганізацыі дзейнасці ў сферы аховы аўтарскіх праў. Ёю стала Фундаментальная бібліятэка Беларускага дзяржаўнага ўніверсітэта (БДУ).
Таксама адбылося ўзнагароджанне пераможцаў конкурсу студэнцкіх работ у сферы інтэлектуальнай уласнасці дыпломамі Нацыянальнага цэнтра інтэлектуальнай уласнасці. Узнагароды ўручыў выконваючы абавязкі генеральнага дырэктара НЦІУ Дзяніс Нядзвецкі.
Пераможцай конкурсу ў намінацыі “Лепшая магістарская дысертацыя” стала Вашэцькава Святлана, магістрант факультэта права Беларускага дзяржаўнага эканамічнага ўніверсітэта, з работай на тэму “Абмежаванні выключных праў на вынікі інтэлектуальнай дзейнасці”. У намінацыі “Лепшая дыпломная работа” прадстаўлена да ўзнагароджання дыпломам Ксендзікава Ірына, студэнтка 5-га курса прыватнай установы адукацыі “БІП – Інстытут правазнаўства”, з дыпломнай работай на тэму “Прававая ахова сродкаў індывідуалізацыі ўдзельнікаў грамадзянскага абароту, іх тавараў, работ, паслуг”. У намінацыі “Лепшая публікацыя” пераможцай стала Прымакова Вольга, студэнтка 5-га курса юрыдычнага факультэта Полацкага дзяржаўнага ўніверсітэта, з публікацыяй на тэму “Рашэнне праблем аўтарскага права ў сетцы Інтэрнэт у Рэспубліцы Беларусь”.
Да ўвагі гасцей была прапанавана кніжная выстаўка “Моладзь Беларусі – інтэлектуальны патэнцыял краіны”, на якой былі прадстаўлены каля 60 сучасных кніг і перыядычных выданняў, што змяшчаюць навуковыя артыкулы маладых вучоных па пытаннях інтэлектуальнай уласнасці і аўтарскага права.
Ва ўрачыстай атмасферы намеснік дырэктара Нацыянальнай бібліятэкі Беларусі Таццяна Кузьмініч падпісала аўтарскія дагаворы на права выкарыстання твораў у электроннай бібліятэцы НББ з дацэнтам кафедры грамадзянскага права юрыдычнага факультэта БДУ Дзіянай Івановай, начальнікам упраўлення права і міжнародных дагавораў НЦІУ Юліяй Фёдаравай, папулярнай беларускай выканаўцай і аўтарам песень Ірынай Відавай.
Вакальная група “Чысты голас” выканала музычныя творы. Госці атрымалі магчымасць пачуць прэм’еру песні з новага музычнага цыкла беларускага кампазітара Алега Моўчана на вершы Янкі Купалы.