25 лютага ў музеі кнігі паспяхова прайшлі заняткі для дзяцей і іх бацькоў “Кніжныя аправы” ў рамках серыі “Клуб кніжных прафесараў”.
Удзельнікі сустрэчы даведаліся, што пераплёт здаўна з'яўляўся важнай часткай кнігі. За сваю шматвяковую гісторыю ён прайшоў як у тэхнічным, так і ў мастацкім плане некалькі стадый развіцця. Таму вывучэнне пераплёту здольна даць вельмі каштоўныя звесткі пра кнігу.
Пераплёт перш за ўсё быў прызначаны для змацавання лістоў кнігі разам, аховы кніжнага блока ад пашкоджанняў і ўплыву часу. Затым ён стаў і элементам мастацкага афармлення. На занятках былі прадэманстраваны ўнікальныя аправы кніг, якія з'яўляюцца помнікамі кніжнага мастацтва свайго часу.
Што мы перш за ўсё бачым, калі падыходзім да паліц хатніх або публічных бібліятэк? Вядома ж, кніжныя пераплёты. Кожны па-свойму ўнікальны, у кожнага свая гісторыя, уласная і непаўторная ... Удзельнікі заняткаў вучыліся “чытаць” аправы старадрукаваных і рэдкіх выданняў.
Мерапрыемства праводзілася ў даступнай і займальнай форме. Пазнанне разнастайнасці кніжнай культуры адбывалася з дапамогай дыялогу, гульняў і творчасці.
