29 студзеня ў музеі кнігі адбыліся заняткі “Васковыя таблічкі”. Вучні мінскай школы № 190 пазнаёміліся з пісьмовым матэрыялам, які выкарыстоўваўся ў даўнія часы.
Аказваецца, раней пісалі не толькі на гліняных таблічках, папірусе або пергаменце, але таксама і на васковых таблічках.
Дзеці і дарослыя разам разглядалі фрагменты малюнкаў на старажытнагрэчаскім посудзе, які захаваў сведчанні аб ўжыванні васковых таблічак у Старажытнай Грэцыі: выявы настаўніка і вучня, якія трымаюць на каленях прылады пісьма, вельмі падобныя на сучасныя ноўтбукі. Пазнаёміліся з найбольш значнымі стылямі роспісу керамічных вырабаў: чорнафігурным і чырвонафігурным вазапісам. Юныя наведвальнікі самастойна спрабавалі распісаць вазу або талерку ў адным з названых старажытнагрэчаскіх стыляў.
І канешне, юныя кнігалюбы не толькі трымалі васковыя таблічкі ў руках, але і пісалі на іх літары, тэкст і матэматычныя прыклады. Пры гэтым як для пісьма, так і для зацірання надпісаў карысталіся пісалам (стылом), як гэта рабілі нашы продкі тысячу гадоў таму назад.
Сачыце за анонсамі наступных музейных заняткаў.
Матэрыял пададзены навукова-даследчым аддзелам кнігазнаўства.
