Ці шануюць памяць беларускіх дзеячаў культуры за межамі Беларусі?
Нядаўна мемарыяльная дошка народнаму паэту Беларусі Янку Купалу была ўстаноўлена ў латвійскай сталіцы Рызе. Помнік размясціўся на будынку Рыжскай беларускай асноўнай школы. Новая дошка была створана па ініцыятыве пасольства Беларусі ў Латвіі і Міністэрства культуры РБ. Аўтар мемарыяла – беларускі скульптар Павел Вайніцкі.
На цырымоніі адкрыцця прысутнічалі міністр культуры Беларусі Барыс Святлоў, Надзвычайны і Паўнамоцны Пасол Беларусі ў Латвіі Аляксандр Герасіменка, намеснік старшыні Рыжскай думы Андрыс Амерыкс, прадстаўнікі беларускіх грамадскіх арганізацый Латвіі, дырэктар Беларускага інфармацыйнага цэнтра Уладзіслаў Рэдзькін, аўтар мемарыяла Павел Вайніцкі, кіраўнік Таварыства садзейнічання латвійска-беларускім эканамічным сувязям Альфрэд Чэпаніс, парламенцкі сакратар Міністэрства культуры Латвіі Інесе Лайзане, прадстаўнікі Юрмальскай гарадской думы і журналісты.
Выступаючы з прывітальным словам, Барыс Святлоў адзначыў, што Міністэрства культуры ў апошнія гады робіць многае, каб увекавечыць імя Янкі Купалы. “Помнікі народнаму паэту адкрыты ў Маскве і Нью-Ёрку, устаноўлены мемарыяльныя дошкі ў Вільнюсе і – сёння – у Рызе. Імем Купалы названы школы ў розных гарадах Беларусі. Нават у Бразіліі адна з бібліятэк названа ў гонар беларускага песняра”, – сказаў ён.
Аўтар помніка Павел Вайніцкі адзначыў, што для яго як для скульптара было гонарам працаваць над выявай Янкі Купалы. “Я лічу, што героі нашай незалежнай краіны не павінны адлюстроўвацца ў вобразе сацыялістычнага рэалізму. У сваёй рабоце я адмовіўся ад простага пераліку анатамічных падрабязнасцей, як гэта было пры сацыялізме, і трактаваў вобраз нацыянальнага героя эмацыянальна і свабодна”, – растлумачыў ён.
За апошнія гады рэалізаваны шэраг праектаў па ўвекавечанні памяці дзеячаў культуры і мастацтва за мяжой. Сярод найбольш значных – устаноўка помніка Уладзіміру Караткевічу ў Кіеве, памятнай дошкі Францішку Багушэвічу ў Вільнюсе. У студзені 2013 года ў літоўскай сталіцы была заменена мемарыяльная дошка Янку Купалу. Працягваецца праца над стварэннем помніка беларускаму і рускаму паэту, драматургу, грамадскаму дзеячу і асветніку Сімяону Полацкаму ў Маскве.
Крыніца: Газета “Аргументы и факты”, 17.04.2013.
Чытайце таксама:
- В Киеве открыт памятник Владимиру Короткевичу
- В Таллине появилась библиотека имени Владимира Короткевича
- Мемориальная доска Янке Купале откроется в Израиле
- Мемориальная доска Янке Купале установлена в Риге
- Мемориальная доска Янке Купале появилась в Вильнюсе
- Площадь Янки Купалы появится в израильском Ашдоде
- Конкурс на создание проекта памятника Я. Купале и Я. Коласу в Варшаве
