Старажытныя рымляне гаварылі: “Напісанае застаецца”. Вучні і настаўнікі ДУА “Сярэдняя школа № 6 г. Жодзіна” імкнуцца, каб напісанае папулярызавала і працягвала справу беларускага першадрукара Францыска Скарыны. Для гэтага яны ажыццявілі праект “Справа Скарыны жыве”.
Першым крокам быў выдадзены да 35-годдзя школы зборнік вершаў на беларускай мове “Пад школьным ветразем надзеі”. У кнігу ўвайшлі творы настаўнікаў Падаляк Г.В., Стрыжанец А.І., Каляды С.М., Турцэвіч П.В. і вучняў школы № 6 розных гадоў выпуску. Большая частка зборніка прысвечана тэме малой радзімы і філасофскім разважанням аўтараў.
Наступным этапам стала прэзентацыя выдадзенай кнігі. Сярод шматлікіх гасцей – аўтараў вершаў, літаратараў, выкладчыкаў ВНУ – была і Тамара Сяргееўна Нуждзіна, кандыдат філалагічных навук, дацэнт кафедры літаратуры Мазырскага педагагічнага ўніверсітэта імя І. Шамякіна, якая ў сваёй прамове адзначыла важнасць захавання роднай культуры і найперш – беларускага слова. На прэзентацыі прысутнічалі і прадстаўнікі СМІ. 25 красавіка 2015 года з’явіўся артыкул у газеце “Жодзінскія навіны”.
Працягам праекта стаў удзел вучаніцы школы № 6 Ірыны Салаўёвай у міжнародным форуме “Скарынаўскія чытанні – 2015: кнігавыданне і распаўсюджванне кніг у кантэксце кроскультурнай камунікацый XXI стагоддзя”. У сваім выступленні дзяўчына прыгадвала, як некалі ў пачатковых класах трымала ў руках твор А. Клышкі “Як да нас дайшла кніга”. А цяпер і самой давялося далучыцца да гэтага дзіва стварэння кнігі, калі яна і яе сябры пачалі працаваць над выдавецкім праектам. Гэта сведчыць аб тым, што справа Скарыны працягвае жыць і аказваць свой непасрэдны ўплыў на фарміраванне грамадзянскай пазіцыі падрастаючага пакалення.
Вярнуўшыся з форуму, Ірына правяла канферэнцыю падчас тыдня беларускай мовы і літаратуры. Яна змагла зацікавіць вучняў рознага ўзросту, даказаўшы, што наша агульная справа – зберагчы самае каштоўнае, што дасталася нам ад продкаў, – родную мову. Гэта стала штуршком для яе аднакласнікаў Уладзіслава Цыбулькі і Сафіі Чакрызавай, якія на працягу наступных трох гадоў займаліся зборам статыстычных даных для працы “Справа Скарыны жыве”. Мэтай было даследаванне кнігадрукавання аўтараў г. Жодзіна і, у прыватнасці, вучняў і настаўнікаў сярэдняй школы № 6 для папулярызацыі іх творчасці. Гэта важная акалічнасць для фарміравання грамадзянскай пазіцыі і ведання гісторыі малой радзімы.
Рэзультаты даследавання і адабраны матэрыял знайшлі прымяненне ў зале “Беларусіка і краязнаўства” бібліятэкі горада Жодзіна, за што вучні атрымалі падзяку ад яе супрацоўнікаў. У выніку члены журы II этапу Рэспубліканскага конкурсу прац даследчага характару адзначылі шматгранны краязнаўчы матэрыял дыпломам I ступені.
Вучні не спыніліся на дасягнутым і вырашылі прыняць удзел у рэспубліканскім краязнаўчым форуме “Беларусь у рамках Года малой радзімы”, ініцыятарам правядзення якога стаў Нацыянальны гістарычны музей Рэспублікі Беларусь. Падчас напісання даследчай працы быў створаны буклет, у якім адлюстраваны спіс аўтараў г. Жодзіна і іх твораў, жанравая і тэматычная класіфікацыя, кароткія звесткі пра аўтараў, а таксама аналіз некаторых вершаў. Улічваючы рэаліі сённяшняга дня, школьнікі стварылі сайт з назвай “Справа Скарыны жыве і будзе жыць!”, які карыстаецца папулярнасцю сярод вучняў і настаўнікаў усіх школ г. Жодзіна, а таксама гараджан.
Зараз да праекта далучаецца ўсё больш удзельнікаў як з малодшых, так і са старэйшых класаў. Яны з задавальненнем прыносяць не толькі свае творы, але і вершы бацькоў, бабуль і дзядуль, яшчэ раз даказваючы, што справа Скарыны жыве і будзе жыць. Арганізатары праекта спадзяюцца, што іх праца паспрыяе больш глыбокаму спазнанню літаратурнай спадчыны землякоў і стане ўкладам у краязнаўчую базу г. Жодзіна.
На здымку: У. Цыбулька і С. Чакрызава з супрацоўніцай жодзінскай гарадской бібліятэкі І. Хілюціч.
Аўтар публікацыі: Падаляк Галіна Васільеўна, настаўніца сярэдняй школы № 6 г. Жодзіна, кіраўнік праекта “Справа Скарыны жыве”.
