ГалоўнаяПаслугiСацыякультурныя паслугіМузей кнігіАрхіў выставакВыстаўкі 2017 г.Кніга кніг

Кніга кніг

З 10 сакавіка ў музеі кнігі (пам. 347) працуе выстаўка “Кніга кніг”, прымеркаваная да 500-годдзя Бібліі Францыска Скарыны і Дня праваслаўнай кнігі.

Выстаўка прысвечана адной з галоўных кніг, якая адыграла знакавую ролю ў развіцці агульначалавечай культуры, святой кнізе хрысціян – Бібліі. У межах хрысціянскага свету біблейскія тэксты аказалі значнае ўздзеянне на ўсе бакі жыцця. Біблія і па сённяшні дзень застаецца самым шматтыражным і самым перакладаемым выданнем свету.

На выстаўцы прадэманстравана гісторыя Кнігі кніг і яе распаўсюджання на беларускіх землях. Сярод экспанатаў XV–XX стст. з фонду бібліятэкі – старажытныя рукапісныя зводы біблейскіх тэкстаў, іх пераклады і выданні на тэрыторыі Беларусі, Расіі, Украіны, Заходняй Еўропы. Гэта арыгінальныя рукапісныя і друкаваныя асобнікі на розных мовах, ілюстраваныя знакамітымі майстрамі розных стагоддзяў.

Упершыню экспануецца ўнікальнае факсімільнае ўзнаўленне аднаго з найстаражытнейшых рукапісных тэкстаў Новага Запавету – “Пасланне Апостала Пятра” на грэчаскай мове, якое датуецца III ст. (выпушчана бібліятэкай Ватыкана). Таксама экспануюцца рукапісныя помнікі ад Тураўскага (ХІ ст.) і Полацкага (ХІІ–ХІІІ стст.) Евангелляў да сучасных манускрыптаў.

Помнікі друкарскага майстэрства ўключаюць асобнік адной з першых друкаваных Біблій Заходняй Еўропы (Ульм, 1475), адзін з першых перакладаў біблейскіх тэкстаў на нямецкую мову (Вітэнберг, 1523), першы дакладны друкаваны пераклад на польскую мову (Кракаў, 1561), першы поўны пераклад на стараславянскую мову (Астрог, 1581). Дэманструюцца выданні тэкстаў Свяшчэннага Пісання друкарняў Беларусі (Куцейна, Магілёў, Еўе), Расіі (Масква), Украіны (Львоў, Кіеў) XVII–XVIII стст., лепшыя ілюстраваныя біблейскія выданні XVII–XX cтст., а таксама першыя спробы перакладаў на рускую і беларускую мовы.

Удзел у адкрыцці выстаўкі прынялі Мітрапаліт Мінскі і Заслаўскі Павел, прадстаўнікі органаў дзяржаўнага кіравання, устаноў навукі, культуры і адукацыі, духавенства, даследчыкі і іншыя зацікаўленыя.

Запрашаем усіх на выстаўку!

Тэлефоны для даведак: (8 017) 293 27 56, 293 27 22.

111