Народнай песні чысты гук

З 14 мая па 11 чэрвеня ў зале нотных і аўдыявізуальных дакументаў (пам. 305) праходзіць юбілейная выстаўка “Народнай песні чысты гук”, прысвечаная 150-годдзю з дня нараджэння беларускага кампазітара і фалькларыста Мікалая Мікалаевіча Чуркіна.

Народны артыст Беларусі Мікалай Чуркін (1869–1964) пакінуў прыкметны след у беларускай музычнай культуры. Ён увайшоў у гісторыю як адзін з заснавальнікаў беларускай прафесійнай музыкі, заснавальнік нацыянальнага жанравага сімфанізму, аўтар першай беларускай оперы. За сваю шматгадовую дзейнасць М. Чуркін напісаў дзясяткі музычных твораў, сярод якіх 2 оперы, 3 сімфаніеты, 2 музычныя камедыі, 11 струнных квартэтаў, вакальныя кампазіцыі, сюіты, музыка да драматычных спектакляў.

Акрамя таго, Мікалай Чуркін займаўся зборам фальклору: ён запісаў і апрацаваў больш за 3 000 народных песень і танцаў. На беларускім фальклоры заснаваны многія творы кампазітара. Да характэрных рыс творчасці Мікалая Мікалаевіча адносяцца аптымістычнасць і ярка выяўленая меладычнасць, кампазіцыйная строгасць, яснасць формы, выкарыстанне мелодыка-рытмічных асаблівасцей і выканальніцкіх прыёмаў беларускай народнай музыкі.

Выстаўка знаёміць наведвальнікаў з нотнымі зборнікамі беларускіх народных песень і танцаў у апрацоўцы Мікалая Чуркіна, а таксама з нотнымі выданнямі твораў кампазітара, сярод якіх п’есы для струннага квартэта “Рэчанька” і “Калыханка”, фрагменты з “Танцавальнай сюіты” і оперы “Раскіданае гняздо”, п’есы для фартэпіяна, творы для скрыпкі і фартэпіяна, шматлікія кампазіцыі на вершы Я. Коласа, Я. Купалы, П. Глебкі і іншых беларускіх паэтаў.

Аўдыядакументы, прадстаўленыя ў экспазіцыі, даюць магчымасць праслухаць сімфаніету “Беларускія карцінкі”, п’есу для скрыпкі і фартэпіяна “Калыханка”, песні “Ты прыйдзі” і “Над ракой” на словы Я. Купалы і інш.

Дапаўняе выстаўку матэрыял пра жыццё і творчасць кампазітара.

Тэлефон для даведак: (8 017) 293 27 52.

Матэрыял прадастаўлены аддзелам абслугоўвання спецыялізаванымі фондамі.