Вяртанне да спадчыны

У зале беларускай літаратуры (пам. 205) з 17 лютага па 30 сакавіка праходзіць юбілейная выстаўка “Вяртанне да спадчыны”, прымеркаваная да 130-годдзя з дня нараджэння беларускага пісьменніка, літаратуразнаўца, публіцыста, перакладчыка, лексікографа, фалькларыста, крытыка, грамадскага дзеяча Максіма Гарэцкага (1893–1938).

У развіцці беларускай мастацкай прозы, публіцыстыкі, крытыкі і гістарычнага літаратуразнаўства значная роля належыць Максіму Іванавічу Гарэцкаму. Сёння спадчына выдатнага пісьменніка стала часткай класічнага фонду беларускай літаратуры. Уся творчасць юбіляра прасякнута пачуццём любові да Радзімы, яе гісторыі, традыцый, нацыянальнай культуры. Ён разумеў і адчуваў велізарную духоўную моц беларуса, яго нераскрытую маральную сілу.

Да ўвагі наведвальнікаў выстаўкі ў раздзеле “З сузор’я класікаў” прадстаўлены прыжыццёвыя выданні, такія як зборнік апавяданняў “Рунь” (1914), драматызаваная аповесць “Антон” (1919), апавяданне “У чым яго крыўда?” (1926), зборнік апавяданняў “Досвіткі” (1926), аповесці “Дзве душы” (1919), “Ціхія песні” (1926), дапрацаванае і пашыранае выданне пад назвай “Ціхая плынь” (1930), дакументальна-мастацкія запіскі “На імперыялістычнай вайне” (1926), драматычныя абразкі “Атрута” (1927), “Мутэрка” (1921), “Жартаўлівы Пісарэвіч” (1928) і інш. У гэтым жа раздзеле экспануецца шмат выданняў М. Гарэцкага ў галіне літаратуразнаўства, мовазнаўства, крытыкі і фалькларыстыкі: “Гісторыя беларускай літаратуры” (1921, 1924, 1926), літаратурна-крытычная праца “«Маладняк» за пяць гадоў, 1923–1928” (1928), “Хрэстаматыя беларускай літаратуры, XI век – 1905 г.” (1922), “Невялічкі беларуска-маскоўскі слоўнік” (1919, 1921), “Маскоўска-беларускі слоўнік” (разам з Г. Гарэцкім, 1920), “Беларуска-расійскі слоўнічак” (1925), “Практычны расійска-беларускі слоўнік” (з М. Байковым, 1924) і таксама зборнік “Народныя песні з мелодыямі” (у суаўтарстве з кампазітарам А. Ягоравым, 1928) і інш.

У раздзеле “Скарбы душы чалавечай” прадстаўлены пераклады Максіма Гарэцкага на беларускую мову твораў У. Арсеньева, Ю. Лібядзінскага, А. Фадзеева, М. Горкага і інш. Значнае месца ў экспазіцыі займаюць працы М. Гарэцкага, перакладзеныя на розныя мовы народаў свету. Таксама на паліцах выстаўкі – кніга “Выпісы з беларускай літаратуры” (1925, Ч. 1, укладальнікі М. Гарэцкі, Ул. Дзяржынскі і П. Каравай); зборнікі “Дэкламатар” (1921), “Зборнік беларускіх ведамасцей” (1921, № 1, 3), у якіх Максім Гарэцкі прадстаўлены як рэдактар-выдавец.

Матэрыялы, змешчаныя ў заключным раздзеле “Шматгалоссе жыцця”, расказваюць пра жыццёвы і творчы шлях юбіляра.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 27 16.