16 кастрычніка ўдзельнiкі праекта “На хвалі часу, у плыні жыцця” наведалі гісторыка-краязнаўчы музей “Бацькаўшчына” ў аграгарадку Камень на Капыльшчыне, дзе дзейнічае пастаянная экспазіцыя, прысвечаная аднаму з удзельнікаў літаб’яднання “Маладняк” Яну Скрыгану (1905–1992).
Паездка была арганізавана сумесна з дачкой пісьменнiка Галінай Іванаўнай Скрыган і адбылася з нагоды 30-годдзя з дня яго смерці. З Галінай Скрыган супрацоўнікі Нацыянальнай бібліятэкі Беларусі (далей НББ) добра знаёмыя: плённае супрацоўніцтва з ёй пачалося яшчэ падчас стварэння віртуальнага раздзела, прысвечанага 115-годдзю Яна Скрыгана, што адзначалася ў 2020 годзе. Галіна Іванаўна актыўна ўдзельнічала ў мерапрыемствах бібліятэкі – літаратурным вечары “Кругі лёсу Яна Скрыгана” і навукова-практычным семінары “Ураджэнцы роднага краю”, шчыра дзялілася цікавымі ўспамінамі, каштоўнымі матэрыяламі, звязанымі з яе бацькам і нават запрашала да сябе ў госці.
Дзякуючы намаганням Галіны Іванаўны і зацікаўленым, ініцыятыўным настаўнікам і вучням на базе ДУА “Каменскі вучэбна-педагагічны комплекс дзіцячы сад – сярэдняя школа” адчыніў свае дзверы гісторыка-краязнаўчы музей “Бацькаўшчына”, які ў мінулым годзе адзначыў 10-годдзе.
Галіна Скрыган у гісторыка-краязнаўчым музеі “Бацькаўшчына”.
16.10.2022
Сёння ў музеі захоўваюцца асабістыя рэчы Яна Скрыгана, арыгіналы яго дакументаў і рукапісаў, фотаздымкі, граматы і ўзнагароды. Сярод экспанатаў можна ўбачыць рабочы стол пісьменніка і яго знакамітыя кіёчкі, якія ён рабіў сам і дарыў сябрам і калегам, а таксама любімую гульню пісьменніка – шахматы. Цікавасць наведвальнікаў выклікаў макет хаты, дзе нарадзіўся Ян Скрыган.
Музей у чамадане і рэчы з кабінета пісьменніка.
Кіёчкі Яна Скрыгана
Макет хаты, дзе нарадзіўся Ян Скрыган
Найлепшыя ўражанні пакінулі гасцінныя, актыўныя і поўныя творчых планаў супрацоўнікі ўстановы – дырэктар школы Галіна Васілевіч і кіраўнік музея, настаўнік малодшых класаў Ірына Тагіль, з якімі Нацыянальная бібліятэка наладзіла добрыя стасункі яшчэ напярэдадні 115-годдзя Яна Скрыгана. У верасні 2021 года разам з імі НББ удзельнічала ў XXVIII Дні беларускага пісьменства ў Капылі, запрашала землякоў Скрыгана на навукова-практычны семінар “Ураджэнцы роднага краю”, які прайшоў у бібліятэцы ў пачатку 2022 года.
Супрацоўнікі паказалі рэдкія экспанаты музея, падзяліліся каштоўнымі ўспамінамі пра ўтварэнне ўстановы, сучаснымі ініцыятывамі, асаблівасцямі працы настаўнікаў, а юная экскурсавод Даша, вучаніца школы, распавяла пра Яна Скрыгана.
Ірына Тагіль паказвае экспанаты.
Экскурсавод Даша распавядае пра Яна Скрыгана.
16.10.2022
Сустрэча прайшла ў цёплай, душэўнай атмасферы і пакінула светлыя ўспаміны. Удзельнікі праекта “На хвалі часу, у плыні жыцця” жадаюць арганізатарам музея поспехаў, натхнення, шмат новых зацікаўленых наведвальнікаў і няспыннай працы па ўшанаванні памяці сваіх землякоў!
Фотаздымкі Таццяны Лаўрык.
Матэрыял падрыхтаваны галоўным бібліёграфам інфармацыйна-аналітычнага аддзела Юліяй Амосавай.