З 6 студзеня па 1 лютага ў зале дакументаў па мастацтве (пам. 306) дэманструецца выстаўка “Чараўнік палітры”, прысвечаная 150-годдзю з дня нараджэння В.А. Сярова (1865–1911).
Валянцін Аляксандравіч Сяроў лічыцца адным з найбольш яркіх рускіх жывапісцаў, графікаў і партрэтыстаў Срэбнага стагоддзя. Мастак унікальнага даравання і гэтак жа ўнікальна рознабаковы, ён бліскуча валодаў усімі жывапіснымі тэхнікамі і меў амаль фатаграфічны зрок. Вострае вока і дакладная рука дазвалялі майстру маментальна схопліваць колер, форму, настрой натуры і перадаваць іх з цудоўнай дакладнасцю.
Усё жыццё жывапісца праходзіла ў бесперапынным пошуку новых напрамкаў і рашэнняў у выяўленчым мастацтве. Ён не жадаў паўтараць удала знойдзеныя прыёмы і спосабы, заўсёды імкнуўся да ўсяго новага і яшчэ не апрабаванага. Пры гэтым В.А.Сяроў, як ніхто іншы, рупіўся пра захаванне самага лепшага, што было ў ранейшых школах жывапісу.
Разнастайнасць яго творчых амплуа распасціраецца ад мастака сельскіх ідылій да велікасвецкага партрэтыста. Ён працаваў у розных тэхніках: ад графічных чорна-белых партрэтаў вуглём да складаных друкаваных літаграфій і медзярытаў. Да ліку найбольш вядомых карцін належаць “Дзяўчынка з персікамі” (1887), “Дзеці” (1899), “Выкраданне Еўропы” (1910), “Партрэт княгіні З.М. Юсупавай" (1902), “Партрэт княгіні В.К. Арловай” (1911), “Партрэт І.А. Марозава” (1910).
У экспазіцыі прадстаўлена звыш 60 дакументаў: альбомы, кнігі, артыкулы, паштоўкі і рэпрадукцыі работ вялікага жывапісца. Сярод іх – кніга дачкі мастака В. Серовай “Воспоминания о моем отце Валентине Александровиче Серове” (1986); даследаванні, прысвечаныя творчасці мастака: У. Лапшын “Валентин Серов” (1995), А. Кудра “Служенье красоте, или Жизнь художника Серова” (2001), М. Копшыцэр “Валянцін Сяроў” (1972) і інш.
Кантактны тэлефон: (8 017) 293 27 53.