З 22 снежня па 6 лютага ў зале беларускай літаратуры (пам. 205) праходзіць выстаўка “Глыток з родных крыніц”, прысвечаная 60-годдзю беларускага мовазнаўца і паэта Рагаўцова Васіля Іванавіча.
Васіль Іванавіч – таленавіты вучоны, член-карэспандэнт Беларускай акадэміі адукацыі, доктар філалагічных навук, прафесар, лаўрэат Літаратурнай прэміі імя В. Хомчанкі (2008), аўтар і суаўтар шматлікіх кніг па мовазнаўстве.
Экспазіцыю складаюць выданні, якія адлюстроўваюць плённую навуковую і навукова-педагагічную працу вучонага. Гэта манаграфія “Маўленчае выражэнне камічнага ў беларускай драматургіі” (2002), што стала асновай доктарскай дысертацыі; комплекс навучальных дапаможнікаў для студэнтаў філалагічных факультэтаў ВНУ Беларусі па тэорыі мовы, сярод якіх – “Практыкум па ўводзінах у мовазнаўства” (1989), “Уводзіны ў мовазнаўства: практыкум” (2003), “Агульнае мовазнаўства: заданні для тэставага кантролю” (2009) і інш. Выстаўка змяшчае працы вучонага, якія друкаваліся ў зборніках, часопісах, энцыклапедычных выданнях.
У экспазіцыі прадстаўлены лексікаграфічныя працы навукоўца. Гэта ўнікальны ў беларускім мовазнаўстве энцыклапедычны даведнік “Мовы свету” (2009), “Слоўнік пра камічнае: мовазнаўчы аспект” (2010) і іншыя, у стварэнні якіх Васіль Іванавіч прымаў удзел як аўтар-укладальнік, суаўтар.
Прыкметнае месца ў жыцці прафесара займае літаратурная творчасць. Васіль Рагаўцоў – аўтар пяці паэтычных зборнікаў: “Сутонне” (1995), “Долягляд” (1998), “Адмыслоўцы” (2007), “На роскрыжы дарог” (2008), “Імгненне і Вечнасць” (2010), з якімі можна пазнаёміцца на выстаўцы.
Апошні раздзел экспазіцыі адведзены матэрыялам пра жыццёвы і творчы шлях вучонага. Асаблівую ўвагу заслугоўвае бібліяграфічны даведнік “Прафесар Васіль Іванавіч Рагаўцоў: навуковая і навукова-педагагічная дзейнасць, літаратурная творчасць” (2011), выдадзены да 60-годдзя юбіляра.
Кантактны тэлефон: 293-27-16.