З 29 жніўня па 30 кастрычніка ў зале прававой інфармацыі (пам. 207b) праходзіць кніжная выстаўка “Медыяцыя: пасрэдніцтва і прымірэнне”, прысвечаная Міжнароднаму дню вырашэння канфліктаў.
Медыяцыя існуе гэтак жа даўно, як і канфлікты. У Старажытным Вавілоне і Старажытнай Грэцыі пры вырашэнні спрэчак звярталіся да дапамогі пасярэднікаў. Гісторыкам добра вядома, што спрадвеку медыяцыя ўжывалася пры вырашэнні міжнародных, міжэтнічных і проста шматбаковых спрэчак. Называлася гэта па-рознаму: “пасрэдніцтва”, “хадайніцтва”, “прапанова добрых паслуг”. Падобныя метады вырашэння спрэчак усё часцей выкарыстоўваліся ў выпадках, калі перамовы заходзілі ў тупік і для дасягнення поспеху трэба было прымусіць бакі-ўдзельнікі спрэчкі зразумець і прыняць пункт гледжання адзін аднаго. Ужо шмат стагоддзяў назад людзі пераканаліся, што пры вырашэнні сур’ёзных рознагалоссяў да разумнага рашэння прасцей прыйсці шляхам перамоў, чым выкарыстоўваючы нормы або іерархічны парадак.
Медыяцыя ў яе сучасным разуменні пачала развівацца ў другой палове 20 стагоддзя перш за ўсё ў краінах англа-саксонскага права – ЗША, Аўстраліі, Вялікабрытаніі, затым паступова распаўсюдзілася ў Еўропе.
Сёння інстытут медыяцыі, які займеў сталую рэпутацыю за час прымянення ў заходніх краінах, усё большае распаўсюджванне атрымлівае ў Расіі і Беларусі.
Прыняцце ў 2013 г. у нашай краіне Закона “Аб медыяцыі” азначае, што дзяржава надае ёй статус законнага спосабу ўрэгулявання прававых спрэчак, прызнае і вынік гэтай працэдуры – заключэнне бакамі медыятыўнага пагаднення.
Медыяцыя – гэта ўніверсальная працэдура. Яе прымяняюць практычна да ўсіх спрэчак, якія ўзнікаюць у сферы прыватнаправавых адносін. Закон стаў важным стымулам яе развіцця ў краіне як комплекснай з’явы, дазволіў пашырыць магчымасці грамадзян і суб’ектаў гаспадарання ў выбары сродкаў урэгулявання канфліктаў, якія ўзнікаюць. З яго прыняццем былі створаны ўмовы для інтэграцыі медыяцыі ў нацыянальную прававую культуру.
Разам з тым варта разумець: каб вырашыць праблему актыўнага станаўлення гэтага інстытута, патрабуецца змяненне свядомасці грамадзян, зацікаўленасць і актыўная жыццёвая пазіцыя людзей, якія маюць дачыненне да гэтай справы, і, вядома, дзяржаўная падтрымка.
Выстаўка будзе цікавая суддзям, медыятарам-практыкам, адвакатам, судовым юрыстам, натарыусам, экспертам у галіне альтэрнатыўнага вырашэння спрэчак, а таксама выкладчыкам, студэнтам, аспірантам юрыдычных ВНУ.
Экспазіцыя налічвае каля 80 дакументаў: кніг, брашур, перыядычных выданняў, аўтарэфератаў дысертацый.
Выстаўка змяшчае наступныя тэматычныя раздзелы:
- Гісторыя, тэорыя, перспектывы развіцця правасуддзя і альтэрнатыўных юрыдычных працэдур.
- Станаўленне і стан развіцця інстытута медыяцыі ў нацыянальным праве.
- Развіццё медыяцыі у Расіі: тэорыя, практыка, адукацыя.
- Прымірэнчыя працэдуры ў замежным праве.
- Медыяцыя ў натарыяльнай і адвакацкай дзейнасці.
- Медыяцыя ў крымінальна-прававой сферы ў Беларусі і іншых краінах.
- Медыяцыя як альтэрнатыўны спосаб вырашэння канфліктаў у розных сферах прававой дзейнасці.
Карысныя спасылкі:
- Арганізацыі, якія забяспечваюць правядзенне медыяцыі ў Рэспубліцы Беларусь
- Медыятар.бел
- Медыяцыя ў Беларусі