14 лістапада ў бібліятэцы пачала працаваць літаратурна-мастацкая выстаўка Кшыштафа Астроўскага “Пасажыр з «Настрома»”, прысвечаная 160-годдзю з дня нараджэння пісьменніка Джозэфа Конрада.
“Сінтэз мастацтваў – адзін з асноўных эстэтычных прынцыпаў Конрада. Яго заўсёды займалі дасягненні мастакоў, скульптараў «...» стаўленне музыкі і жывапісу да літаратуры. Конрад вялікую ўвагу надаваў ілюстрацыям да ўласных раманаў, не раз падкрэсліваючы, што літаратура ў ідэале павінна імкнуцца да пластычнасці скульптуры, шматзначнасці і сімвалічнасці музыкі, выразнасці малюнка...” – пісала ў сваім артыкуле, прысвечаным творчасці Джозэфа Конрада, былы генеральны дырэктар Усесаюзнай дзяржаўнай бібліятэкі замежнай літаратуры, першы віцэ-прэзідэнт Міжнароднай федэрацыі бібліятэчных асацыяцый і ўстаноў (IFLA) Кацярына Юр’еўна Гéніева. З гэтага артыкула, апублікаванага у дзевяцітомным акадэмічным выданні “Гісторыя сусветнай літаратуры”, пачынаецца кніжная частка літаратурна-мастацкай выстаўкі “Пасажыр з «Настрома»”.
Кніжная экспазіцыя ўключае больш за 30 выданняў класіка англійскай літаратуры з фонду Нацыянальнай бібліятэкі Беларусі, у тым ліку прыжыццёвых. На выстаўцы можна ўбачыць зборы твораў, выбраныя творы, зборнікі, асобныя раманы, аповесці, апавяданні і іншыя публікацыі Джозэфа Конрада на англійскай, польскай, нямецкай, украінскай мовах.
Прадстаўлены літаратурны дэбют Конрада – раман “Капрыз Алмэйра”, яго наступныя раманы “Негр з «Нарцыса»”, “Лорд Джым”, “Настрома”, “Перамога”, аповесці “Сэрца цемры”, “Юнацтва”, “Тайфун”, “Дуэль”, “Фрэйя Сямі Выспаў” і іншыя творы.
Асноўная частка выданняў размяшчаецца ў экспазіцыі ў храналагічным парадку напісання твораў.
Лепшыя кнігі Конрада прысвечаны мору, ён быў выдатным марыністам у літаратуры. Аднак галоўнай творчай заслугай пісьменніка літаратуразнаўцы і крытыкі лічаць уменне выкрываць глыбіні таямніц чалавечага лёсу, асобы, характару. Выстаўка зацікавіць аматараў класічнай замежнай літаратуры.
Выстаўка "Пасажыр з "Ностромо»" была ўрачыста адчынена і працуе ў галерэі “Атрыум” (3-ці паверх) да 15 студзеня 2018 года.
Дата заканчэння работы выстаўкі можа быць зменена.
Тэлефон для даведак: (8 017) 293 29 80.
|
|
|
|
|
|
|
|
|
|
|
|
