5 мая адзначаецца 205-годдзе з дня нараджэння Станіслава Манюшкі (1819–1872) – сусветна вядомага кампазітара і дырыжора, нашага земляка, які зрабіў значны ўнёсак у станаўленне беларускай музычнай культуры.
Да гэтай даты Нацыянальная бібліятэка Беларусі актуалізавала ўжо дзеючы віртуальны праект “Станіслаў Манюшка. Музычны рамантык з Міншчыны”, які пабачыў свет пяць гадоў таму, а сёлета папоўніўся новымі ўнікальнымі матэрыяламі.
У 2019 годзе 200-гадовы юбілей кампазітара, які быў унесены ў Спіс памятных дат ЮНЕСКА, стаў выключнай падзеяй для ўсяго музычнага свету. Юбілейная дата паспрыяла значнай цікавасці да асобы і творчасці кампазітара ў розных краінах, у тым ліку і ў Беларусі, якая ўзгадавала выбітнага музыканта. У розных куточках нашай краіны разгарнулася шырокае святкаванне, былі рэалізаваны шматлікія значныя ініцыятывы. Да ўшанавання памяці знакамітага земляка далучылася і наша бібліятэка і ў межах Рэспубліканскага плана мерапрыемстваў па святкаванні 200-годдзя з дня нараджэння кампазітара стварыла маштабны віртуальны праект, які быў прэзентаваны на розных пляцоўках і меў шырокі рэзананс.
Сёлета да дня нараджэння земляка бібліятэка папоўніла дзеючы праект новым раздзелам “Да 205-годдзя з дня нараджэння С. Манюшкі”. У ім прадстаўлены матэрыялы пра ўсе ініцыятывы, якія ладзіліся ў гонар кампазітара за апошняе пяцігоддзе: агляд кніжных і нотных навінак з фондаў Нацыянальнай бібліятэкі Беларусі, спісы артыкулаў з газет і часопісаў, інфармацыя пра ўшанаванне памяці кампазітара з 2019 года да нашых дзён.
Цяпер усе зацікаўленыя творчасцю Станіслава Манюшкі могуць зайсці на старонку новага раздзела і даведацца пра ўсе актуальныя ініцыятывы, якія датычацца асобы і спадчыны кампазітара.
Несумнеўным упрыгожаннем абноўленага праекта з’яўляецца ўнікальны раздзел “З архіва Вялікага тэатра Беларусі”, які ўдалося стварыць дзякуючы плённаму супрацоўніцтву бібліятэкі з архівам Нацыянальнага акадэмічнага Вялікага тэатра оперы і балета Рэспублікі Беларусь. У раздзеле можна ўбачыць каштоўныя дакументы: афішы выбітных опер Станіслава Манюшкі “Галька” і “Страшны двор”, якія некалі былі прадстаўлены беларускай публіцы на сцэне Вялікага тэатра Беларусі.
З архіва Вялікага тэатра Беларусі
Раздзел змяшчае слайдары, у якіх дэманструюцца копіі ўнікальных фотаздымкаў сцэн са спектакляў манюшкаўскіх опер. Напрыклад, на адных выявах – сцэны з оперы “Галька” ў пастаноўцы 1975 года. Другія даюць магчымасць убачыць фотафрагменты “Страшнага двара” – оперы, якая доўгі час чакала сцэнічнага ўвасаблення ў Беларусі і ўпершыню пабачыла свет у 1952 годзе. На шэрагу выяў – вядомыя артысты ў вобразах герояў музычнага твора: Тамара Ніжнікава, Мікалай Сярдобаў, Міхаіл Зюванаў, Соф’я Друкер, Мікалай Ворвулеў і іншыя.
З архіва Вялікага тэатра Беларусі
На іншых здымках – пастановачная група оперы, дзе пазнаецца вядомая беларуская інтэлігенцыя: Ларыса Александроўская, Маскім Танк, Павел Масленікаў, Канстанцін Мулер, Леў Любімаў…
З архіва Вялікага тэатра Беларусі
Дзякуючы гэтым каштоўным фотаздымкам, карыстальнікам даецца рэдкая магчымасць прайсці ўвесь шлях пастаноўкі оперы: ад рэпетыцый і наказаў рэжысёра Ларысы Александроўскай перад выхадам на сцэну да авацый пасля паспяховай прэм’еры і фінальнай памятнай фатаграфіі натхнёных і шчаслівых артыстаў.
З архіва Вялікага тэатра Беларусі
Нацыянальная бібліятэка Беларусі дзякуе архіву Вялікага тэатра Беларусі за каштоўныя дакументы, якія папоўнілі і ўпрыгожылі праект.
Запрашаем усіх зацікаўленых пазнаёміцца з новымі матэрыяламі віртуальнага праекта і натхніцца музыкай нашага земляка, “музычнага рамантыка з Міншчыны”.
Матэрыял пададзены інфармацыйна-аналітычным аддзелам.