З 28 лістапада па 31 снежня ў зале беларускай літаратуры (пам. 205) праходзіць юбілейная выстаўка “Святло паэтычнага дару”, прысвечаная 100-годдзю з дня нараджэння Аляксея Сцяпанавіча Русецкага (сапр. Бурдзялёў) (1912–2000).
Творчасці А. Русецкага – беларускага паэта, перакладчыка, заслужанага работніка культуры Беларусі, лаўрэата Літаратурнай прэміі імя А. Куляшова – уласцівы філасофскі роздум аб ролі паэзіі і навукі ў жыцці чалавека. Яго вершы і паэмы прасякнуты ўсведамленнем адказнасці чалавека за лёс планеты, яны насычаны шчырай любоўю да Радзімы, жанчыны, роднай прыроды. У творах пісьменніка праблемы сучаснасці часта пераплятаюцца з гісторыяй роднай зямлі.
У першым раздзеле “Залатыя россыпы паэзіі” прадстаўлены кнігі Аляксея Сцяпанавіча. Сярод іх – “Выбраныя творы” ў 2 т. (1982), тэматычныя паэтычныя зборнікі “У заўтрашні свет” (1951), “Святло акон тваіх” (1959), “Усход і захад” (1962), “Служба святла” (1967), зборнік, які выйшаў у 1969 г. у серыі “Бібліятэка беларускай паэзіі”, і інш. Экспануюцца таксама зборнікі, выдадзеныя ў 70–90-я гг.: “Зямля гаворыць зорам” (1971), “Два колеры жыцця”(1973), “Позірк” (1977), “Паэмы” (1979), “Крокі сэрца” (1980), “На зломе лёсу” (1995) і інш.
“У сяброўстве з зямлёй і зоркамі” – так называецца раздзел, у якім размешчаны часопісы і калектыўныя зборнікі, дзе публікаваліся творы А. Русецкага. Сярод іх – шырокавядомыя паэмы “Другі пачатак” (1958), “Яго вялікасць” (1964), “Маналог Зямлі” (1969), “Поле жыцця”(1974), “Айкумена” (1981), “Хвала жыццю” (1984).
У раздзеле “Шчырасць радка” прадстаўлены творы паэта ў перакладах на мовы свету: англійскую, рускую, грузінскую, іспанскую, латышскую, польскую, французскую і інш.
Аляксей Сцяпанавіч добра вядомы як таленавіты перакладчык на беларускую мову твораў украінскіх, польскіх і расійскіх паэтаў. З яго перакладчыцкай дзейнасцю можна пазнаёміцца ў раздзеле “Дакладнасць думак і настрояў”.
Раздзел “Паэт і яго героі” знаёміць з публікацыямі пра жыццё і творчы шлях А. Русецкага. Сярод аўтараў – вядомыя беларускія пісьменнікі і крытыкі Р Бярозкін, М. Стральцоў, А. Лойка, А. Марціновіч, В. Бечык, У. Гніламёдаў, М. Арочка, А. Бачыла і інш.
Выстаўка багата ілюстравана фотаздымкамі паэта.
Кантактны тэлефон: 8 (017) 293 27 16.
 |
 |
 |
 |
 |
 |
 |
 |
 |
 |
 |
 |
