З 17 лістапада па 15 снежня 2008 года ў зале беларускай літаратуры (пам. 205) праходзіць юбілейная выстаўка “Яркая зорка на небе паэзіі”, прысвечаная 60-годдзю з дня нараджэння паэтэсы Яўгеніі Іосіфаўны Янішчыц (1948–1988), лаўрэата прэміі Ленінскага камсамола Беларусі (1978), Дзяржаўнай прэміі Беларусі імя Я. Купалы (1986).
“Яўгенія Янішчыц, – зазначаў літаратуразнаўца і крытык Дзмітрый Бугаёў, – увайшла ў беларускую паэзію так, як гаспадыня ўваходзіць ва ўласны, добра абжыты дом, – свабодна, нязмушана і натуральна”.
Любоў да Радзімы і людзей, успаміны пра дзяцінства – вось тыя крыніцы, якія поўнілі лірыку Я. Янішчыц духоўнай энергіяй. Яе вершы, прысвечаныя маці, бацьку, сыну, – гэта старонкі не толькі асабістай біяграфіі, але і лірычная хроніка гісторыі беларускага народа. Глыбокае пранікненне ва ўнутранае “Я” чалавека дазволіла паэтэсе стварыць шэраг праўдзівых вобразаў людзей вёскі, паказаць сілу і веліч простага селяніна.
Адной з лепшых старонак беларускай паэзіі стала інтымная лірыка Я. Янішчыц, у якой найбольш выразна раскрылася незвычайнае духоўнае свячэнне яе чалавечай і творчай асобы.
У зборніках паэзіі Я. Янішчыц “Снежныя грамніцы” (1970), “Дзень вечаровы” (1974), “Ясельда” (1978), “На беразе пляча” (1980), “Пара любові і жалю” (1983), “Каліна зімы” (1987), “У шуме жытняга святла” (1988, апошні прыжыццёвы зборнік паэтэсы) глыбокі і самабытны роздум пра жыццё, бацькоўскі край, гераічнае мінулае і сучаснасць.
У 2000 г. выйшла кніга “Выбранае” , а ў 2008 г. – зборнік “Пачынаецца ўсё з любві…”, у які ўвайшлі лепшыя творы паэтэсы.
Пэўнае месца ў творчасці Я. Янішчыц займалі пераклады рускіх і ўкраінскіх паэтаў, такіх як Сяргей Ясенін, Ліна Кастэнка і інш.
Вершы паэтэсы перакладзены на англійскую, балгарскую, іспанскую, нямецкую, польскую, рускую, украінскую мовы.
Многія лірычныя творы Яўгеніі Іосіфаўны пакладзены на музыку. Да паэзіі Я. Янішчыц звярталіся кампазітары
Р. Давыдаў, Ю. Семяняка, М. Юрко і інш.
На выстаўцы прадстаўлена больш за 70 выданняў. Гэта публікацыі твораў Я. Янішчыц, а таксама матэрыялы пра яе жыццё і творчасць.
Кантактны тэлефон: 293-27-16.
 |
 |
 |
 |
 |
 |
