З 2 снежня па 6 студзеня ў зале нотных і аўдыядакументаў (пам. 305) праходзіць выстаўка “Жыццё маё – дарогі, песні...”, прысвечаная 80-годдзю З.Я. Мажэйкі, беларускага этнамузыколага, кінематаграфіста.
Уся творчая і навуковая дзейнасць заслужанага дзеяча мастацтваў Беларусі (1987), лаўрэата прэміі Саюза кампазітараў СССР імя акадэміка Б. Асаф’ева (1991) і Дзяржаўнай прэміі Беларусі (1994) Зінаіды Якаўлеўны Мажэйкі неразрыўна звязана з беларускай вёскай.
Пад час экспедыцый этнамузыколаг асабіста знаёмілася з самабытнымі спевакамі, збірала ўзоры народных песень, якія сталі асновай зборнікаў “Песенная культура Белорусского Полесья: Село Тонеж” (1971), “Песні Беларускага Паазер’я” (1981), “Песні Беларускага Падняпроўя” (ў сааўтарстве з Т.Б. Варфаламеевай) (1999). Гэтыя і іншыя зборнікі з узорамі беларускіх народных песень складаюць аснову экспазіцыі.
Зінаіда Мажэйка – адзін з аўтараў калектыўных прац “Вяселле: Песні” (1980–1988), “Белорусская этномузыкология: Очерки истории (XIX–XX вв.)” (1997), а таксама энцыклапедычнага выдання “Музыка” (2008) з серыі “Беларусы”.
Экспазіцыя знаёміць са шматлікімі артыкуламі вучонага, надрукаванымі ў часопісах, навуковых зборніках і энцыклапедыях розных краін. Выстаўка ілюстравана фотаздымкамі З.Я. Мажэйкі.
Кантактны тэлефон: (8 017) 293 27 52.