13 верасня ў галерэі “Лабірынт” Нацыянальнай бібліятэкі Беларусі адбылося адкрыццё Рэспубліканскай выстаўкі манументальнага мастацтва.
Мерапрыемства прайшло па ініцыятыве Міністэрства культуры Рэспублікі Беларусі з мэтай дэманстрацыі самых лепшых твораў манументальнага мастацтва, якія створаны за 20-годдзе існавання беларускай дзяржаўнасці і ярка адлюстроўваюць беларускую нацыянальную мастацкую школу.
У экспазіцыі, размешчанай у дзвюх галерэях Нацыянальнай бібліятэкі Беларусі, прадстаўлены фатаграфіі твораў манументальнага мастацтва, у тым ліку помнікаў, роспісу, габеленаў, мазаік, вітражоў.
Адкрыў вернісаж міністр культуры Рэспублікі Беларусь Павел Латушка. Да гасцей выстаўкі са словамі прывітання звярнуліся дырэктар Нацыянальнай бібліятэкі Беларусі Раман Матульскі, старшыня секцыі манументальнага мастацтва Беларускага саюза мастакоў Алесь Суша, рэктар Беларускай дзяржаўнай акадэміі мастацтваў Міхась Баразна, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб.
Экспазіцыя размяшчаецца ў галерэях “Лабірынт” і “Атрыум” Нацыянальнай бібліятэкі Беларусі і будзе доўжыцца да 10 кастрычніка 2011 г.