9 ліпеня ў Нацыянальнай бібліятэцы Беларусі адбылося адкрыццё выстаўкі пераможцаў нацыянальнага конкурсу Літвы па дызайне Geras dizainas – 2013.
Арганізатары конкурсу – асацыяцыя Lietuvos dizaino forumas (Форум дызайну Літвы) і Міністэрства культуры Літоўскай Рэспублікі – разлічваюць на прызнанне значнасці такой галіны, як дызайн. Гэта будзе спрыяць развіццю крэатыўнай індустрыі і эканомікі ў цэлым.
Конкурс прадставіў грамадскасці лепшы дызайн, створаны літоўскімі дызайнерамі або ўкаранёны літоўскімі прадпрыемствамі за апошнія два гады. У рабоце міжнароднага журы сёлета прыняў удзел старшыня Беларускага саюза дызайнераў Дзмітрый Сурскі.
На адкрыцці выстаўкі выступілі першы намеснік дырэктара Нацыянальнай бібліятэкі Беларусі Алена Далгаполава, Надзвычайны і Паўнамочны Пасол Літоўскай Рэспублікі ў Рэспубліцы Беларусь Эвалдас Ігнатавічус, дырэктар Lietuvos dizaino forumas Вітаўтас Гурэвічус, прадстаўнік Беларускага саюза дызайнераў, архітэктар Аляксандр Трусаў.
На выстаўцы былі прадстаўлены ўкаранёныя ў вытворчасць работы ўсіх відаў дызайну, уключаючы прамысловы, графічны дызайн (у тым ліку ўпакоўкі), дызайн адзення, інтэр’еру і мультымедыя.