13 студзеня ў канферэнц-зале бібліятэкі прайшоў творчы вечар беларускага паэта Фёдара Баравога і прэзентацыя яго новага выдання “У стагоддзя на руках”.
Пад час мерапрыемства гучалі вершы з новага зборніка аўтара. З водгукамі і ўспамінамі перад гасцямі выступілі беларускія пісьменнікі, выдавец кнігі. Цёплую атмасферу стварылі жывая размова Фёдара Баравога з гледачамі. Лірычны вечар суправаджаўся і музычнымі нумарамі, сярод якіх былі песні, напісаныя аўтарам, кампазіцыі ў выкананні скрыпкі, гітары, раяля і віяланчэлі. Добрыя і светлыя ўражанні падарыў паэт прыхільнікам сваёй дзейнасці.
Творчасць Фёдара Баравога – гэта ода каханню. Каханню як пачуццю і светаадчуванню. Яго песні і вершы поўныя радасці і адчаю, у іх апяваецца сіла і прыгажосць чалавечай душы, шчырасць і глыбіня пачуццяў, непаўторнасць кахання, адлюстроўваецца дух нашага часу.
Знакамітая лірычная паэтэcа Рыма Казакова адазвалася аб творчасці паэта так: “Ад гэтых вершаў цёпла, яны працятыя такой неадольнай воляй да шчасця, да здабыцця адзінага і сапраўднага кахання, што да іх цягне, як у марозны дзень да вясёлага трэску паленцаў у печы, як да першага пераможнага вясновага сонейка. І думаецца: да чаго ж многа, бязмежна многа змяшчаецца ласкі, дабра, святла ў чалавечай душы, якая кахае!”
 |
 |
 |
 |
 |
 |
