28 сакавіка адбудзецца прэзентацыя выдання Мікалая Улашчыка “Збор твораў у 3 х тамах. Том 1. Працы па археаграфіі і крыніцазнаўству”.
Мікалай Улашчык (1906–1986) – гісторык, археограф, крыніцазнавец, перакладчык і пісьменнік, які па праву займае пачэснае месца сярод беларускіх гісторыкаў XX стагоддзя. Яго імя вядома далёка за межамі Беларусі – да навуковых прац М. Улашчыка звяртаюцца вучоныя многіх краін. А звяртацца ёсць да чаго – спадчына сапраўды ўнушальная! Чатыры навуковыя манаграфіі і яшчэ адна няскончаная, мемуары, гісторыка-этнаграфічны нарыс пра родную вёску, шматлікія артыкулы, рэцэнзіі – усяго каля трох тысяч старонак тэксту завяшчаў вучоны будучым пакаленням.
Падрыхтоўка да выпуску збору твораў М. Улашчыка вялася шмат гадоў. Нарэшце, напачатку 2017 года ў выдавецтве “Інбелкульт” пабачыў свет першы том. У яго ўвайшлі манаграфіі “Нарысы па археаграфіі і крыніцазнаўству гісторыі Беларусі феадальнага перыяду” і “Уводзіны ў вывучэнне беларуска-літоўскага летапісання”, артыкулы, рэцэнзіі і прадмовы да публікацый на адпаведную тэматыку, а таксама пасмяротныя выданні, якія планаваліся як працяг распачатай тэматычнай серыі. Большасць твораў М. Улашчыка ў арыгінале напісаны па-руску, частка – па-беларуску і некалькі па-польску. Дадзенае выданне збору твораў па-беларуску сімвалічна вяртае спадчыну гісторыка на Радзіму і робіць яе даступнай шырокаму кругу чытачу.
Пачатак мерапрыемства а 16-й гадзіне ў зале адукацыйных тэхналогій (пам. 346, 3-ці паверх).
Тэлефоны для даведак: (8 017) 293 79 80, 293 27 56, 266 37 37.
Е-mail: pr@nlb.by
