Нацыянальная бібліятэка пры рэтраспектыўным камплектаванні фонду атрымлівае ў дар кнігі даваеннага перыяду выпуску, якія часта знаходзяцца ў вельмі дрэнным фізічным стане. Перад тым, як прадставіць гэтыя кнігі нашым чытачам, іх трэба адрэстаўрыраваць.
Прыклад рэстаўрацыі кнігі, атрыманай бібліятэкай у дар: Дополнения к курсу алгебры, требуемые программами конкурсных экзаменов. Шмулевич П.К., С.-Петербург 1904 г.
Кніга, якая паступіла да нас, мела значныя сляды бытавання: шматлікія паметы, была моцна забруджаная, найбольш быў пашкоджаны пераплёт (карашок адсутнічаў, меў страты кардону, папяровае крыццё старонак было моцна сцёрта, мела вялікія страты). Цікавай асаблівасцю дадзенай кнігі было ўлажэнне лістоў паперы (з пячаткамі і цісненнем) у спецыяльна расслоеную для гэтых мэт пярэднюю кардонную старонку пераплётнай крышкі.
Лісты кнігі былі хімічна ачышчаны (з папярэднім замацаваннем пячатак і памет), выпрастаны, адноўлены іх страты, блок быў перашыты на шнуры па схеме арыгінала, выраблена новая пераплётная крышка, візуальна падобная да аўтэнтычнай. Для ўложаных лістоў была выраблена спецыяльная кішэня, якая была прымацавана да задняга форзаца. У хуткім часе кніга будзе даступная чытачам.
Нацыянальная бібліятэка Беларусі аказвае паслугі па рэстаўрацыі кніг рознай складанасці.
Матэрыял пададзены аддзелам рэстаўрацыі і кансервацыі бібліятэчных дакументаў.
