7 снежня ў Нацыянальнай бібліятэцы Беларусі (НББ) адбыўся семінар-дыялог “Рэстаўрацыя папяровага дакумента ў дзейнасці бібліятэк і архіваў”.
У мерапрыемстве ўзялі ўдзел звыш 40 спецыялістаў з рэспубліканскіх і бібліятэк ВНУ Беларусі, цэнтральнай лабараторыі мікрафільмавання і рэстаўрацыі дакументаў Нацыянальнага архіўнага фонду Рэспублікі Беларусь.
У дакладах вядучых спецыялістаў НББ (Каваленка З.С., загадчыцы аддзела рэстаўрацыі і кансервацыі, Кірэевай Г.У., загадчыцы навукова-даследчага аддзела кнігазнаўства, Муратавай Д.А., загадчыцы сектара дэзінфекцыі, Сінельнікавай К.У., мікрабіёлага сектара дэзінфекцыі) і Сіліна І.В., дырэктара ДУ “Цэнтральная лабараторыя мікрафільмавання і рэстаўрацыі дакументаў Нацыянальнага архіўнага фонду Рэспублікі Беларусь”, былі асветлены тэарэтычныя і практычныя пытанні мікрабіялагічнага даследавання, дэзінфекцыі і рэстаўрацыі папяровага дакумента.
Разгледжаны пытанні мікрабіялагічнай бяспекі пры захоўванні папяровых дакументаў, спосабы іх рэстаўрацыі і асаблівасці захаванасці пры экспанаванні.
Звернута ўвага на наступнае:
- актуальнасць праблемы біялагічнай бяспекі папяровых дакументаў;
- неабходнасць вывучэння і ўкаранення новых тэхналогій у рэстаўрацыю;
- мэтазгоднасць правядзення навучальных мерапрыемстваў па рэстаўрацыі і кансервацыі дакументаў;
- мэтазгоднасць стварэння пастаянна дзейнага форуму па рэстаўрацыі і адпаведнага прафесійнага аб’яднання.
У рамках семінара-дыялогу ўдзельнікам была прадстаўлена магчымасць наведаць аддзел рэстаўрацыі і кансервацыі бібліятэчных дакументаў, азнаёміцца з работай рэстаўрацыйнай лістадаліўнай машыны, а таксама комплексам мерапрыемстваў па забеспячэнні фізічнай захаванасці дакументаў.