26 лістапада ў Нацыянальнай бібліятэцы Беларусі адбылося сумеснае пасяджэнне калегій Міністэрства культуры Рэспублікі Беларусь і Міністэрства культуры Расійскай Федэрацыі.
Беларускі бок узначаліў міністр культуры Рэспублікі Беларусь Анатоль Маркевіч, расійскую дэлегацыю – міністр культуры Расійскай Федэрацыі Вольга Любімава.
Для расійскай дэлегацыі была праведзена аглядная экскурсія па будынку бібліятэкі, падчас якой госці пазнаёміліся з архітэктурнымі асаблівасцямі і гісторыяй кніжнай скарбніцы, наведалі яе найбольш значныя месцы і дзеючыя экспазіцыі, ацанілі патэнцыял установы, як найбуйнейшага інфармацыйнага і сацыякультурнага цэнтра Беларусі.
На пасяджэнні ў якасці асноўных пытанняў абмяркоўваліся актуальныя праблемы і тэндэнцыі развіцця бібліятэчнай, музейнай, тэатральнай, музычнай, кінематаграфічнай і іншых сфер культуры і мастацтва.
З дакладам аб супрацоўніцтве паміж бібліятэкамі Беларусі і Расіі выступіў генеральны дырэктар Нацыянальнай бібліятэкі Беларусі Раман Матульскі. Ён адзначыў, што прыярытэтным напрамкам у дадзены момант з’яўляецца сумесная праца па фарміраванні і выкарыстанні электронных інфармацыйных рэсурсаў. “Даўно сфарміраваныя і наладжаныя дружалюбныя і дзелавыя адносіны з’яўляюцца надзейным гарантам нашай паспяховай сумеснай працы ў будучыні”, – падкрэсліў Раман Сцяпанавіч.
Генеральны дырэктар Расійскай нацыянальнай бібліятэкі Аляксандр Вяршынін таксама распавёў аб узаемадзеянні бібліятэк Расіі і Беларусі, адзначыўшы, што развітая ў гэтых краінах бібліятэчная сістэма спрыяе павелічэнню ролі бібліятэк у арганізацыі міжкультурнага супрацоўніцтва. “Узаемадзеянне арганізуецца на ўсіх узроўнях, і ў яго ўцягнуты бібліятэкі розных тыпаў. Гэта стварае ўмовы для ўключэння ў культурныя кантакты не толькі насельніцтва сталічных цэнтраў, але і гарадоў, і сельскіх паселішчаў, як спецыялістаў – наведвальнікаў навуковых бібліятэк, так і грамадзян розных рэгіёнаў нашых краін”, – рэзюмаваў Аляксандр Паўлавіч.
Сёння, 27 лістапада, у Беларускім дзяржаўным музеі гісторыі Вялікай Айчыннай вайны адбудзецца дыскусійна-выставачнае мерапрыемства “Да 75‑годдзя агульнай перамогі. Роля расійскай і беларускай культуры ў захаванні гістарычнай памяці і процідзеянні фальсіфікацыі гісторыі”. Яно пройдзе ў рамках візіту расійскай дэлегацыі ў Мінск.
Глядзіце таксама рэпартаж тэлеканала "Беларусь 1".
Матэрыял пададзены аддзелам сувязей з грамадскасцю.