14 верасня адбудзецца адкрыццё пакоя – музея кнігі і бібліятэкі пры Магілёўскай абласной бібліятэцы імя У.І. Леніна.
Адкрыццё музейнага пакоя прымеркавана да Дня бібліятэк. На яго будуць запрошаны прадстаўнікі ўлады, дырэктары і намеснікі дырэктараў мінулых гадоў, прадстаўнікі абласнога аддзялення Саюза пісьменнікаў Беларусі, абласных устаноў культуры, бібліятэкары, сябры бібліятэкі, прэса.
Мэта стварэння пакоя-музея –
- узнавіць гісторыю Магілёўскай абласной бібліятэкі;
- захаваць інфармацыю для будучых супрацоўнікаў і сяброў бібліятэкі пра яе і бібліятэкараў;
- прадэманстраваць матэрыяльнае ўвасабленне – кнігі, перыядычныя выданні, бібліятэчную тэхніку.
У рабоце над музейным пакоем былі выкарыстаны кнігі загадаў бібліятэкі, пачынаючы з 5 студзеня 1935 года, матэрыялы Нацыянальнага архіва Беларусі, Дзяржаўнага архіва Магілёўскай вобласці, Дзяржаўнага архіва грамадскіх аб'яднанняў Магілёўскай вобласці, успаміны ветэранаў бібліятэкі.
Такім чынам, у складзе экспазіцый музейнага пакоя будуць прадстаўлены наступныя тэматычныя блокі: “Бібліятэка з пачатку заснавання”, “Дырэктары бібліятэкі”, “Рэдкая кніга”, “Краязнаўчая кніга”, “Бібліятэка ў гады Вялікай Айчыннай вайны”, “Спецыяльнае сховішча: забароненая літаратура ў бібліятэцы” і інш.
У далейшым у пакоі – музеі кнігі і бібліятэкі пры Магілёўскай абласной бібліятэцы будуць праходзіць адукацыйныя мерапрыемствы для навучэнцаў і студэнтаў бібліятэчнай прафесіі, метадычныя мерапрыемствы для бібліятэкараў вобласці, экскурсіі для ўсіх жадаючых.
Магілёўская абласная бібліятэка, якая ў 2010 годзе адзначыла сваё 75-годдзе, з'яўляецца найбуйнейшай дзяржаўнай публічнай бібліятэкай рэгіёна, функцыянуе і развіваецца ў адпаведнасці з мэтамі і задачамі па падтрымцы навуковай і адукацыйнай дзейнасці, а таксама арганізацыі вольнага часу насельніцтва Магілёўскай вобласці.
Штогод бібліятэку наведваюць звыш 43 тысяч чытачоў. Фонд налічвае больш за 780 тысяч адзінак захоўвання, калекцыя краязнаўчых і мясцовых выданняў – больш за 2 тысячы адзінак захоўвання, фонд рэдкіх і каштоўных выданняў – звыш 5 тысяч друкаваных выданняў. Самае ранняе выданне датуецца 1790 годам. Акрамя традыцыйных друкаваных выданняў, у фондзе маюцца ноты, грампласцінкі, электронныя дакументы (CD, DVD).
Апроч абслугоўвання чытачоў і краязнаўчай дзейнасці, з першых месяцаў працы бібліятэка стала метадычным цэнтрам для бібліятэк Магілёўскай вобласці. Сярод супрацоўнікаў бібліятэкі было нямала годных людзей – удзельнікаў магілёўскага падполля і Вялікай Айчыннай вайны, дэлегатаў ВДНГ у Маскве, дэпутатаў мясцовых Саветаў і шматдзетных маці.
75-гадовая гісторыя найбуйнейшай бібліятэкі вобласці змяшчае шмат цікавых фактаў і прафесійных падзей, годных памяці нашчадкаў.
