Дата правядзення
Час правядзення
Месца правядзення
17 лютага а 16-й гадзіне ў музеі кнігі адбудзецца цырымонія перадачы ў дар старадрукаваных кірылічных выданняў з Магілёўскай друкарні ад прадстаўнікоў найстарэйшага ў Беларусі мотаклубу ўладальнікаў матацыклаў Harley-Davidson.
Клуб H.O.G Minsk Chapter Belarus, створаны 5 лютага 2013 года, з’яўляецца афіцыйным падраздзяленнем міжнароднай суполкі ўладальнікаў матацыклаў Harley-Davidson. Мотаклуб ажыццяўляе актыўную дзейнасць па стварэнні пазітыўнага іміджу мотаруху ў Беларусі, садзейнічае рэалізацыі разнастайных матацыклетных праграм, папулярызацыі актыўнага ладу жыцця, а таксама ўдзельнічае ў культурна-асветніцкіх праектах. У рамках святкавання 10-годдзя супольнасці старадрукі ў бібліятэчны фонд перадасць ганаровы член клуба Ігар Яўсееў.
Фонд Нацыянальнай бібліятэкі Беларусі папоўняць два стараверскія выданні – “Часоўнік” і “Псалтыр”, якія ўбачылі свет у друкарні Магілёва ў 30-х гадах XVIIІ ст. Адпаведныя богаслужбовыя выданні былі распаўсюджаны на беларускіх землях. Іх выкарыстоўвалі не толькі падчас богаслужэння, але і для хатняга навучання грамаце. Таму захавалася няшмат асобнікаў. Прадстаўленыя экзэмпляры маюць характэрнае для стараверскіх выданняў XVIIІ ст. афармленне (застаўкі, ініцыялы, вязь), а таксама ўнікальныя рукапісныя ўстаўкі і малюнак з выявай цара Давіда.
Перададзеныя выданні зоймуць пачэснае месца ў калекцыі кніг кірылічнага друку ў фондзе бібліятэкі.
Уваход на мерапрыемства вольны, у іншыя дні – па чытацкім білеце
або білеце сацыякультурнага цэнтра.
Тэлефоны для даведак: (8 017) 293 27 81, 293 27 22.
Матэрыял пададзены навукова-даследчым аддзелам кнігазнаўства.