Дата правядзення
Час правядзення
Месца правядзення
Нацыянальная бібліятэка запускае серыю майстар-класаў з удзелам вядомых майстроў народнай творчасці Беларусі ў рамках выставачнага праекта “Фарфоравае асарці”.
16 і 23 сакавіка а 15-й у выставачным комплексе (пам. 104) ладзяцца сустрэчы з членам Беларускага саюза майстроў народнай творчасці Наталляй Керус па дэкарыраванні талерак у тэхніцы “трафарэт”.
Яшчэ ў часы старажытных цывілізацый дэкарыраванне посуду ператварылася ў сапраўднае мастацтва. Тады ўпрыгожваннем керамікі займаліся жанчыны, сёння захоплены і мужчыны, і дзеці.
Як мінімум 6 тысяч гадоў таму на керамічных вырабах з’явіліся ўзоры і арнамент. Талеркі, кубкі, рознае начынне ўпрыгожвалася магічнымі коламі, вітымі лініямі, таямнічымі ўзорамі. Выявы людзей, жывёл і раслін таксама можна ўбачыць на знойдзеных у ходзе раскопак прадметах.
Роспіс быў тэматычным, да прыкладу, калі керамічныя блюды прызначаліся для садавіны, старажытныя майстры іх і малявалі.
Лічыцца, што дзякуючы дэкору талерак актыўна развівалася выяўленчае мастацтва ў цэлым. Ускладняліся сюжэты, адточваліся дэталі, мастакі шукалі новыя каляровыя магчымасці і прадумвалі майстэрскія ўзоры і арнаментальны дэкор.
Вялікія размаляваныя талеркі могуць стаць удалым упрыгожаннем інтэр’ера, маленькія, зробленыя сваімі рукамі будуць цудоўным падарункам блізкім у сувязі з важнай падзеяй альбо проста без нагоды.
На майстар-класе наведвальнікі змогуць стварыць сваю непаўторную талерку пры дапамозе дэкору.
Для ўдзелу ў майстар-класе неабходна:
- абавязкова зарэгістравацца: (8 017) 293 27 50;
- прынесці з сабой керамічную талерку для яе далейшага дэкарыравання.
Наведванне майстар-класа ўваходзіць у кошт наведвання выставы “Фарфоравае асарці”:
- для дарослых – 7 руб.
- для навучэнцаў сярэдніх, сярэдніх спецыяльных і вышэйшых навучальных устаноў (пры прад’яўленні дакумента) – 5 руб.
Час работы выстаўкі адпавядае рэжыму работы бібліятэкі.
Выстава будзе доўжыцца да 12 снежня 2023 года.
Дата заканчэння яе працы можа быць зменена.
Тэлефоны для даведак: (8 017) 368 37 37, 293 27 50.
Матэрыял пададзены аддзелам сувязей з грамадскасцю.