Дата правядзення
Час правядзення
Месца правядзення
З 28 лістапада па 13 снежня ў аддзеле абслугоўвання афіцыйнымі дакументамі (пам. 207) адкрыта тэматычная выстава “Механізмы процідзеяння сучаснаму рабству”, прысвечаная Міжнароднаму дню барацьбы за адмену рабства.
Гэты Дзень штогод адзначаецца 2 снежня і звязаны з датай прыняцця Генеральнай асамблеяй ААН Канвенцыі аб барацьбе з гандлем людзьмі і з эксплуатацыяй прастытуцыі трэцімі асобамі (рэзалюцыя 317 (IV) ад 2 снежня 1949 года).
Рабства стала беспрэцэдэнтнай трагедыяй і адной з самых цёмных старонак чалавечай гісторыі. Сёння мы жывём у цывілізаваным грамадстве, дзе рабства афіцыйна адменена і забаронена. Аднак у рэчаіснасці і ў нашы дні яно не выкаранена, а проста прыняло новыя формы.
Хоць сучаснае рабства не мае заканадаўчага вызначэння, паняцце выкарыстоўваецца як агульны тэрмін, які ахоплівае такія практыкі, як прымусовая праца, пазыковая кабала, прымусовы шлюб і гандаль людзьмі. Па сутнасці, гэта адносіцца да сітуацый эксплуатацыі, ад якой чалавек не можа адмовіцца з-за пагроз, насілля, прымусу, падману і/або злоўжывання ўладай.
Прапанаваная чытачам выстава налічвае каля 100 дакументаў на рускай, англійскай і нямецкай мовах. Гэта кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя знаёміць чытача з даследаваннямі феномену сучаснага рабства і гандлю людзьмі, а таксама з міжнародна-прававымі аспектамі рэгулявання і процідзеяння гэтай праблеме ў рамках ААН, АБСЕ, МАП і іншых міжнародных арганізацый. Асобны раздзел выставы прысвечаны ініцыятывам Беларусі, накіраваным на прадухіленне злачынстваў, звязаных з новымі формамі сучаснага гандлю рабамі.
Сярод прадстаўленых на выставе дакументаў – даклады па пытанні аб гандлі людзьмі, зборнікі міжнародных і нарматыўных прававых актаў Рэспублікі Беларусь у сферы процідзеяння гандлю людзьмі, практычныя інструкцыі, зборнікі навуковых прац, матэрыялы навукова-практычных канферэнцый, манаграфіі і інш.
Выстава ўключае наступныя тэматычныя раздзелы:
- Гісторыя, формы праявы і сутнасць рабства і гандлю рабамі
- Сучасныя формы рабства
- Прымусовая праца. Дзіцячая праца
- Гандаль людзьмі
- Міжнароднае супрацоўніцтва і міжнародна-прававыя аспекты рэгулявання барацьбы з рабствам і гандлю рабамі
- Рэспубліка Беларусь супраць трафікінгу
Сучаснае рабства існуе амаль ва ўсіх краінах свету і перасякае этнічныя, культурныя і рэлігійныя межы. Па даных ААН, кожны год мільёны людзей, у асноўным жанчыны і дзеці, трапляюць у рабства, становяцца ахвярамі падману і насілля, ператвараюцца ў “жывы тавар” і падвяргаюцца эксплуатацыі. Іх выкрадаюць, прадаюць, прымушаюць працаваць і жыць у нечалавечых умовах. “Новы гандаль рабамі” стаў адной з самых вострых і шырокамаштабных праблем сучаснасці.
Выстава прызначана для супрацоўнікаў следчых і аператыўных падраздзяленняў праваахоўных органаў, псіхолагаў, сацыяльных работнікаў, суддзяў, адвакатаў, выкладчыкаў і студэнтаў вышэйшых навучальных устаноў юрыдычнага профілю, а таксама ўсіх зацікаўленых станам праблем кіравання працэсамі барацьбы з міжнародным рабствам і гандлю рабамі.
Карысныя спасылкі
Дэкларацыі, канвенцыі і пагадненні
- Факультатыўны пратакол да Канвенцыі аб правах дзіцяці датычна гандлю дзецьмі, дзіцячай прастытуцыі і дзіцячай парнаграфіі (2000)
- Пратакол аб папярэджанні і спыненні гандлю людзьмі, асабліва жанчынамі і дзецьмі, і пакаранні за яго, які дапаўняе Канвенцыю ААН супраць транснацыянальнай арганізаванай злачыннасці (2000)
- Рэкамендацыя аб згодзе на ўступленне ў шлюб, мінімальным шлюбным узросце і рэгістрацыі шлюбаў (1965)
- Канвенцыя аб згодзе на ўступленне ў шлюб, шлюбным узросце і рэгістрацыі шлюбаў (1962)
- Дадатковая канвенцыя аб скасаванні рабства, гандлю рабамі і інстытутаў і звычаяў, падобных з рабствам (1956)
- Пратакол аб унясенні змяненняў у Канвенцыю аб рабстве, падпісаную ў Жэневе 25 верасня 1926 года (1953)
- Канвенцыя аб барацьбе з гандлем людзьмі і з эксплуатацыяй прастытуцыі трэцімі асобамі (1949)
- Усеагульная дэкларацыя праў чалавека (1948)
- Канвенцыя аб рабстве (1926)
Канвенцыі Міжнароднай арганізацыі працы (МАП)
- Пратакол да Канвенцыі 1930 года аб прымусовай працы (2014)
- Канвенцыя аб забароне і неадкладных мерах па выкараненні найгоршых форм дзіцячай працы (Канвенцыя № 182, 1999)
- Канвенцыя аб мінімальным узросце для прыёму на працу (Канвенцыя № 138, 1973)
- Канвенцыя аб скасаванні прымусовай працы (Канвенцыя № 105, 1957)
- Канвенцыя аб прымусовай працы (Канвенцыя № 29, 1930)
Дадатковыя рэсурсы
- Кампанія Генеральнага сакратара ААН “Разам спынім гвалт адносна жанчын” (25 лістапада)
- Інфармацыйна-прапагандысцкая праграма па трансатлантычным гандлі рабамі і рабстве
- Міжнародны дзень памяці ахвяр рабства і трансатлантычнага гандлю рабамі
- Сусветны дзень барацьбы з дзіцячай працай
- Міжнародны дзень барацьбы за адмену рабства (A/RES/317(IV))
Са спісамі літаратуры да тэматычных выставак можна азнаёмiцца тут.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 26.
Матэрыял пададзены аддзелам абслугоўвання афіцыйнымі дакументамі.