Дата правядзення
Час правядзення
Месца правядзення
Юбілейная выстаўка “Сіла роднай зямлі”, прысвечаная 80-годдзю беларускага пісьменніка Казіміра Вікенцьевіча Камейшы, праходзіць з 2 снежня па 2 студзеня ў зале беларускай літаратуры (пам. 205).
У паэтычным шматгалоссі сучаснай беларускай літаратуры, несумненна, адно з першых месцаў належыць Казіміру Камейшу. Асноўныя тэмы творчасці пісьменніка – гэта любоў да Радзімы, чалавек працы, непаўторная прырода Налібоцкага краю. У сваіх творах ён імкнецца закрануць самыя вострыя праблемы сучаснасці, засяроджвае ўвагу чытача на спрадвечных каштоўнасцях чалавека: любві, дабрыні, высакароднасці.
Адкрывае экспазіцыю раздзел, у якім наведвальнікі бібліятэкі маюць магчымасць пазнаёміцца з літаратурнай спадчынай пісьменніка. Тут шырока прадстаўлены яго творы ў асобных выданнях і зборніках. Сярод экспанатаў – першы зборнік вершаў “Восеньскія позвы”, зборнікі “Мембрана”, “Нектар”, “Тут мае вёсны прычалены”, “Галоўная вярста”, “Ад Кромані да Свіцязі”, “Яблыня спакою” і інш. Аб плённай працы юбіляра ў галіне дзіцячай літаратуры сведчаць кнігі для дзяцей: “Гаёўка”, “Буслянка”, “Добры дзень, шафёр” і інш. Асаблівай ўвагі заслугоўвае літаратуразнаўчая дзейнасць Казіміра Вікенцьевіча: ён займаецца вывучэннем творчасці М. Багдановіча, М. Маляўкі, А. Пысіна і інш., выступае з рэцэнзіямі, крытычнымі артыкуламі, нарысамі.
На выстаўцы шырока прадстаўлена дзейнасць пісьменніка як рэдактара і перакладчыка. Наведвальнікі могуць пазнаёміцца з яго перакладамі з рускай, польскай, літоўскай, грузінскай і іншых моў.
У апошнім раздзеле экспазіцыі да ўвагі аматараў творчасці юбіляра прадстаўлены матэрыялы аб яго жыццёвым і творчым шляху, змешчаныя ў літаратурна-крытычных публікацыях, энцыклапедычных і перыядычных выданнях.
Выстаўка налічвае каля 150 дакументаў.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.