Звіняць цымбалы

Тэматычная выстава “Звіняць цымбалы”, прысвечаная гісторыі і развіццю беларускага цымбальнага мастацтва, праходзіць з 18 студзеня па 18 лютага ў зале нотных і аўдыявізуальных дакументаў (пам. 305).

Цымбалы з’яўляюцца музычным сімвалам Беларусі і займаюць важнае месца ў аркестры народных інструментаў. Калісьці яны былі прыналежнасцю толькі народнага музыцыравання, цяпер – арганічная састаўная частка высокаразвітай беларускай прафесіянальнай культуры.

Неацэнная роля ў развіцці цымбальнага мастацтва Беларусі належыць народнаму артысту СССР Іосіфу Жыновічу. Менавіта ён упершыню ўжыў на канцэртнай эстрадзе цымбалы як сольны інструмент. Стаў першым беларускім цымбалістам-прафесіяналам і ўвогуле па праве лічыцца роданачальнікам беларускай школы цымбалістаў. Таму на выставе надзелены ўвагай яго жыццё і творчасць і, канешне, дзейнасць Дзяржаўнага акадэмічнага народнага аркестра Рэспублікі Беларусь імя І. Жыновіча.

На экспазіцыі прадстаўлены нотныя выданні: зборнік п’ес для цымбалаў і фартэпіяна “Красавіцкі настрой” А. Клеванца, зборнік п’ес для цымбалаў “Мелодыя” С. Герашчанкі, “Белыя бярозы Беларусі” Г. Ермачэнкава, зборнік канцэртных твораў для ансамбля цымбалістаў “Вяртанне да спадчыны”, “Школа ігры на цымбалах” І.І. Жыновіча і шмат іншых.

Такія аўдыядакументы, як “Музыка для цымбалаў”, “Беларускі ансамбль цымбалістак «Мілавіца»”, “Фантазия на две белорусские народные темы”, народны танец “Лявониха”, канцэртная п’еса для цымбалаў і народнага аркестра “Кірмашовыя забавы” і інш., даюць магчымасць пазнаёміцца з мелодыкай інструмента, а таксама пашырыць музычны кругагляд з дапамогай фондаў бібліятэкі.

Дапаўняюць экспазіцыю кнігі і артыкулы з часопісаў па тэматыке выставы.

Тэлефон для даведак: (8 017) 293 27 52.