Дата правядзення
Час правядзення
Месца правядзення
З 18 студзеня па 16 лютага ў аддзеле абслугоўвання афіцыйнымі дакументамі (пам. 207) адкрыта тэматычная выстава “Водна-балотныя ўгоддзі: сучасны стан і выкарыстанне”, прысвечаная Сусветнаму дню водна-балотных угоддзяў.
30 жніўня 2021 года Генеральная асамблея ААН прыняла рэзалюцыю (A/RES/75/317), якая абвясціла 2 лютага Сусветным днём водна-балотных угоддзяў. У гэты дзень у 1971 годзе ў Рамсары (Іран) была прынята Канвенцыя аб водна-балотных угоддзях. Дадзены дакумент з’яўляецца міжурадавым дагаворам, мэта якога – “захаванне і разумнае выкарыстанне ўсіх водна-балотных угоддзяў шляхам ажыццяўлення мясцовых, рэгіянальных, нацыянальных дзеянняў і міжнароднага супрацоўніцтва”.
На сённяшні дзень 172 дзяржавы з’яўляюцца бакамі Канвенцыі. Яны выдзяляюць на сваёй тэрыторыі водна-балотныя ўгоддзі, якія маюць міжнароднае значэнне і якія ўносяцца ў Рамсарскі спіс водна-балотных угоддзяў міжнароднага значэння.
Рэспубліка Беларусь далучылася да Рамсарскай канвенцыі ў 1999 годзе. Заказнік рэспубліканскага значэння “Спораўскі” – першая тэрыторыя, якая была ўключана ў спіс водна-балотных угоддзяў міжнароднага значэння. Сёння ў краіне 26 водна-балотных угоддзяў на плошчы 778,9 тыс. га ўключаны ў Рамсарскі спіс водна-балотных угоддзяў міжнароднага значэння.
Прапанаваная выстава налічвае каля 80 дакументаў на рускай і англійскай мовах. Гэта кнігі, брашуры, перыядычныя выданні, буклеты. Яны пазнаёмяць чытача з адной з самых ключавых экасістэм планеты, ад стану якой шмат у чым залежыць наша будучыня – сістэмай водна-балотных угоддзяў.
Прадстаўленыя на выставе матэрыялы знаёмяць з унікальнай флорай і фаўнай балот, а таксама з калектыўнымі намаганнямі дзяржаў і міжнародных арганізацый, накіраванымі на захаванне і рацыянальнае выкарыстанне водна-балотных угоддзяў.
Сярод прадстаўленых на выставе матэрыялаў – зборнікі міжнародна-прававых дакументаў і нацыянальных заканадаўчых актаў па пытаннях захавання і разумнага выкарыстання водна-балотных угоддзяў, манаграфіі, матэрыялы навуковых даследаванняў, даведачныя выданні, матэрыялы навукова-практычных канферэнцый і г.д.
Экспазіцыя ўключае наступныя тэматычныя раздзелы:
- Рамсарская канвенцыя і водна-балотныя ўгоддзі міжнароднага значэння
- Фаўна, экалогія і ахова птушак водна-балотных угоддзяў
- Водна-балотныя экасістэмы і прыродныя тэрыторыі ў Беларусі, якія знаходзяцца пад аховай
Выстава будзе цікавая студэнтам і аспірантам экалагічных, біялагічных і геаграфічных спецыяльнасцяў, спецыялістам у галіне прыродакарыстання і аховы навакольнага асяроддзя, навуковым работнікам, а таксама ўсім тым, хто цікавіцца праблемай захавання водна-балотных угоддзяў і біялагічнай разнастайнасці нашай планеты.
Абвяшчэнне гэтага Дня было выклікана заклапочанасцю сусветнай грамадскасці хуткім скарачэннем і дэградацыяй адных з ключавых экасістэм планеты – водна-балотных угоддзяў. Мэта Дня – звярнуць увагу грамадскасці і кіраўніцтва розных краін на неабходнасць беражлівых адносін да асяроддзя пражывання вадаплаўных птушак і важнасць водна-балотных угоддзяў у экасістэме планеты Зямля. Тэма Дня гэтага года – “Водна-балотныя ўгоддзі і дабрабыт чалавека”.
Карысныя спасылкі
- Афіцыйны сайт Рамсарскай канвенцыі
- Сусветны дзень водна-балотных угоддзяў
- Міністэрства прыродных рэсурсаў і экалогіі Расійскай Федэрацыі
- Міністэрства прыродных рэсурсаў і аховы навакольнага асяроддзя Рэспублікі Беларусь
- Дзяржаўная інспекцыя аховы жывёльнага і расліннага свету пры Прэзідэнце Рэспублікі Беларусь
- Нацыянальная справаздача па выкананні Рамсарскай канвенцыі за 2005–2007 гг.
- Справаздача аб выкананні праекта “Устойлівае кіраванне ляснымі і водна-балотнымі экасістэмамі для дасягнення шматмэтавых пераваг”
- Глабальны агляд водна-балотных угоддзяў (Global Wetland Outlook)
- Рэзалюцыя аб абвяшчэнні Дня
- Канвенцыя аб водна-балотных угоддзях
З пералікам лiтаратуры да тэматычных выстаў можна азнаёмiцца ў раздзеле “Спісы літаратуры да выставак за 2024 год”.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 26.
Матэрыял пададзены аддзелам абслугоўвання афіцыйнымі дакументамі.