Дата правядзення
Час правядзення
Месца правядзення
З 15 лютага па 18 сакавіка ў зале дакументаў міжнародных арганізацый (пам. 207g) адкрыта тэматычная кніжная выстава “Турызм будучыні”, прысвечаная Сусветнаму дню ўстойлівага турызму.
Гэта новае свята, якое з’явілася ў міжнародным календары знамянальных і памятных дат ААН у мінулым годзе. Яно было абвешчана Генеральнай асамблеяй 6 лютага 2023 года (рэзалюцыя A/RES/77/269) і будзе штогод адзначацца 17 лютага.
Устойлівы турызм, уключаючы экатурызм, з’яўляецца шматпланавым відам дзейнасці і можа спрыяць рэалізацыі трох кампанентаў устойлівага развіцця і дасягненню мэт у галіне ўстойлівага развіцця, у тым ліку шляхам садзейнічання эканамічнаму росту, памяншэння маштабаў галечы, забеспячэння поўнай і прадукцыйнай занятасці і годнай працы для ўсіх.
Прапанаваная выстава налічвае каля 100 дакументаў на рускай, беларускай і англійскай мовах. Гэта кнігі, брашуры, перыядычныя выданні, буклеты, мімеаграфаваныя матэрыялы.
У гэтых дакументах разглядаюцца асноўныя тэндэнцыі развіцця міжнароднага турызму, раскрываецца паняцце ўстойлівага турызму, даецца ацэнка сучаснаму стану сусветнай і беларускай турыстычнай індустрыі.
Чытачы і карыстальнікі пазнаёмяцца з асновамі арганізацыі турызму, кіраваннем турыстычнымі прадпрыемствамі, а таксама з рознымі напрамкамі турыстычнай дзейнасці.
Сярод прапанаваных дакументаў – міжнародныя прававыя дакументы, энцыклапедыі і даведнікі, манаграфіі, турыстычныя даведнікі, матэрыялы навукова-практычных канферэнцый, статыстычныя зборнікі, навучальныя дапаможнікі.
Экспазіцыя ўключае наступныя тэматычныя раздзелы:
- Прававое забеспячэнне міжнароднага турызму – міжнародныя рэкамендацыі і стандарты, нарматыўна-прававыя акты
- Устойлівы турызм і ўстойлівае развіццё: роля і значэнне турызму ў эканамічным і сацыяльным развіцці краін і рэгіёнаў
- Роля турызму ва ўмацаванні культурных сувязей, узаемапавагі і ўзаемаразумення паміж народамі
- Эканоміка, геаграфія і арганізацыя міжнароднага турызму
- Развіццё індустрыі турызму і турыстычнага бізнесу ў Рэспубліцы Беларусь
Выстава будзе карысная спецыялістам у галіне турызму, арганізатарам турысцкага бізнесу, студэнтам вышэйшых навучальных устаноў турыстычнага профілю, а таксама ўсім, хто цікавіцца міжнародным турызмам і любіць падарожнічаць.
Развіццё турызму – адзін з прыярытэтных напрамкаў сацыяльна-эканамічнага развіцця Рэспублікі Беларусь. Дзяржаўная праграма “Беларусь гасцінная” на 2021–2025 гг. накіравана на фарміраванне і развіццё сучаснага канкурэнтаздольнага турыстычнага комплексу, павелічэнне ўкладу турызму ў развіццё нацыянальнай эканомікі – турызм паступова становіцца адной з ключавых галін для стварэння новых працоўных месцаў, эканамічнага росту і прыцягнення інвестыцый.
Турыстычны патэнцыял Беларусі заключаецца ў разнастайнасці і прыгажосці прыроды, унікальнасці гісторыка-культурнай спадчыны. У рэспубліцы налічваецца больш за 15 тысяч аб’ектаў, якія маюць гістарычную, культурную, архітэктурную значнасць, а таксама памятных месцаў, звязаных з імёнамі выдатных дзеячаў сусветнай гісторыі і культуры.
Карысныя спасылкі
Дакументы
- Рэзалюцыя A/RES/77/269 “Сусветны дзень устойлівага турызму”
- Рэзалюцыя A/RES/77/178 “Садзейнічанне развіццю ўстойлівага і жыццястойкага турызму, уключаючы экатурызм, у мэтах ліквідацыі галечы і аховы навакольнага асяроддзя”
- Даклад A/77/219 Генеральнага сакратара Сусветнай турысцкай арганізацыі аб садзейнічанні развіццю ўстойлівага турызму, уключаючы экатурызм, у інтарэсах ліквідацыі галечы і аховы навакольнага асяроддзя
- Дэкларацыя Глазга аб змяненні клімату і турызме
- Даклад з нагоды Сусветнага дня турызму ў 2022 годзе: Ад крызісу да трансфармацыі
Вэб-сайты
- Сусветная турысцкая арганізацыя (СГА ААН)
- Аднаўленне турызму
- Сусветны турыстычны барометр
- Панэль даных па турызме
- Партал СГА і Міжнароднай асацыяцыі паветранага транспарту
- Спіс лепшых вёсак для турызму ў 2022 годзе
- Рэсурсы Міжнароднай арганізацыі грамадзянскай авіяцыі (ІКАО)
- Мэты ў галіне ўстойлівага развіцця
- Турызм для МУР
- Сусветны дзень турызму
- Сусветны дзень устойлівага турызму 17 лютага
З пералікам лiтаратуры да тэматычных выстаў можна азнаёмiцца ў раздзеле “Спісы літаратуры да выставак за 2024 год”.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.