Дата правядзення
Час правядзення
Месца правядзення
Юбілейная выстава “Заснавальнік чэшскай класікі”, прысвечаная 200-годдзю з дня нараджэння чэшскага кампазітара, піяніста, дырыжора, педагога, музычна-грамадскага дзеяча Бедржыха Сметаны (1824–1884), праходзіць з 20 лютага па 23 красавіка ў зале нотных і аўдыявізуальных дакументаў (пам. 305).
Бедржых Сметана – адзін з найбуйнейшых музыкантаў, які стаяў ля вытокаў чэшскай кампазітарскай школы. Яго музыка адрозніваецца яркай нацыянальнай самабытнасцю і глыбока звязана з народнай творчасцю. Ён быў першым кампазітарам, які выкарыстоўваў у сваіх творах чэшскія народныя сюжэты і матывы, рытмы і інтанацыі народных песень і танцаў. У спадчыне Б. Сметаны прадстаўлены практычна ўсе музычныя жанры: опера, сімфанічная паэма, камерна-інструментальная і фартэпіянная музыка, вакальна-харавыя творы. Вяршыняй яго кампазітарскай спадчыны сталі оперныя і праграмна-сімфанічныя сачыненні.
Акрамя сачынення музыкі Бедржых Сметана выступаў як піяніст і дырыжор, узначальваў музычную секцыю “Умелецкай бяседы”, працаваў з хорам “Дзеяслоў Пражскі”, быў адным з заснавальнікаў Філарманічнага таварыства, пісаў музычна-крытычныя артыкулы, выкладаў у адкрытай ім жа музычнай школе. Бурная і шматгранная творчая і грамадская дзейнасць Б. Сметаны спрыяла росквіту нацыянальнай культуры Чэхіі, а яго сачыненні належаць да ліку прызнаных шэдэўраў сусветнага музычнага мастацтва.
На выставе прадстаўлены нотныя выданні твораў кампазітара: оперы “Прададзеная нявеста”, “Брандэнбуржцы ў Чэхіі”, “Пацалунак”, цыкл сімфанічных паэм “Мая радзіма”, сімфанічная паэма “Рычард III”, кантата для змешанага хору і аркестра “Чэшская песня”, зборнікі фартэпіянных, харавых і вакальных твораў.
Аўдыядакументы, прадстаўленыя ў экспазіцыі, даюць магчымасць праслухаць Квартэт № 2 для дзвюх скрыпак, альта і віяланчэлі, оперу “Прададзеная нявеста”, два дуэты для скрыпкі і фартэпіяна “Родны край”, фартэпіянны цыкл “Чэшскія танцы” і інш.
Дапаўняюць выставу кнігі і артыкулы з перыядычных выданняў пра жыццё і творчасць кампазітара.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
