Дата правядзення
Час правядзення
Месца правядзення
Выстаўка “Асноўны закон дзяржавы” прымеркавана да 30-годдзя Канстытуцыі Рэспублікі Беларусь, прынятай 15 сакавіка 1994 г. Яна з’яўляецца першай у гісторыі суверэннай рэспублікі і пятай па ліку Канстытуцыяй Беларусі, якая дзейнічала пасля Кастрычніцкай рэвалюцыі 1917 г.
Вялікае значэнне мае абноўленая рэдакцыя Канстытуцыі Рэспублікі Беларусь, прынятая на рэспубліканскім рэферэндуме 27 лютага 2022 г. У ёй замацаваны такія ўніверсальныя каштоўнасці, як чалавек, яго правы і свабоды, суверэнітэт, народаўладдзе, вяршэнства права, сацыяльная справядлівасць, роўнасць усіх перад законам. Прапісаны абавязак грамадзян Рэспублікі Беларусь па захаванні гістарычнай памяці аб гераічным мінулым беларускага народа, культурнай і духоўнай спадчыны.
Кніжна-дакументальная выстаўка падрыхтавана сумесна з Нацыянальным архівам Рэспублікі Беларусь і ўключае каля 60 дакументаў, якія адлюстроўваюць храналогію падрыхтоўкі і прыняцця Канстытуцыі нашай дзяржавы, унясенне змяненняў і дапаўненняў у яе ў сувязі з палітычнымі, сацыяльна-эканамічнымі і культурнымі зменамі.
Сярод выданняў з фонду Нацыянальнай бібліятэкі Беларусі – арыгінальныя друкаваныя экзэмпляры Канстытуцыі Рэспублікі Беларусь розных гадоў, навуковыя і навукова-метадычныя зборнікі па пытаннях правапрымянення Асноўнага закону дзяржавы і канстытуцыйнага права Рэспублікі Беларусь, а таксама актуальныя публікацыі ў перыядычным друку. У кніжным шэрагу таксама прадстаўлены навуковыя выданні, у якіх раскрываюцца асноўныя палажэнні дзеючай Канстытуцыі, яе роля і месца ў сістэме дзяржаўнага ладу краіны.
У ліку прадстаўленых архіўных дакументаў – копіі праектаў Канстытуцыі Рэспублікі Беларусь ад 1993 і 1994 гг., копіі пастановы Вярхоўнага Савета Рэспублікі Беларусь аб праекце Канстытуцыі Рэспублікі Беларусь, пратаколы Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў і іншыя дакументы.
Дзеючая Канстытуцыя Рэспублікі Беларусь – той фундамент, які дае арыенціры далейшага развіцця беларускага грамадства і дзяржавы. Запрашаем кожнага азнаёміцца з экспазіцыяй, каб разумець сутнасць і значэнне Асноўнага закону нашай дзяржавы, актыўна выконваць грамадзянскія абавязкі і паважаць законы сваёй краіны.
З 5 па 25 сакавіка ў зале прававой інфармацыі (пам. 207b) адкрыта тэматычная выстава “Канстытуцыя: гартаючы старонкі гісторыі”, прысвечаная 30-годдзю Канстытуцыі Рэспублікі Беларусь.
Час экспанавання з 15 сакавіка па 30 красавіка ў кальцавой галерэі 2-га паверха.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.