Бiблiятэка кнiг сабралася ў серыi «Жывая класiка дзецям», якой апякуецца выдавецтва «Мастацкая лiтаратура». Вось i толькi што па заказе Мiнiстэрства iнфармацыi Рэспублiкi Беларусь ажыццёўлены выпуск зборнiка з 16 вершаў народнага паэта Беларусi Рыгора Барадуліна «Сем янотаў».
Каля дзвюх тысяч хлопчыкаў i дзяўчынак краiны (такi наклад у кнiгi), а мо i шмат болей, змогуць прачытаць творы, якiя добра вядомыя старэйшаму пакаленню цiкаўных да беларускай лiтаратуры чытачоў. «Чаму гром злуецца», «Босы дождж», «Цi аса, цi куса?», «Вярблюд збiраўся ў Белавеж», «Год-карагод» – гэтыя i iншыя вершы i вершаваныя казкi даўно сталi хрэстаматыйнымi. I для iх, як нi для якiх iншых твораў, падыходзiць азначэнне «жывая класiка», гэта значыць, тая мастацкая спадчына, у якой увасабляюцца найлепшыя характарыстыкi i народнай творчасцi, i мастацкага вопыту папярэднiкаў, адлюстроўваецца сама культура Беларусi.
I хоць народны паэт Беларусi Рыгор Барадулiн пайшоў з жыцця ў iншы свет ужо болей як шэсць гадоў назад, з году ў год перавыдаюцца яго паэтычныя творы. Паэт-класiк – у полi зроку i выдаўцоў, i, зразумела, чытачоў.
А ў серыi «Жывая класiка дзецям» у ранейшыя гады «Мастацкая лiтаратура» выдала зборнiкi твораў, адрасаваных дзецям, аўтарамi якiх з'яўляюцца Якуб Колас, Янка Купала, Максiм Багдановiч, Максiм Танк... У хуткiм часе да чытача прыйдуць кнiгi паэтаў Магiлёўшчыны – Аляксея Пысiна i Алеся Пiсьмянкова.
Аўтар публікацыі: Мiкола Берлеж.
Крыніца: газета "Звязда"
