На бягучым тыдні ў Беларусі праходзяць мерапрыемствы, прысвечаныя 85-годдзю з дня нараджэння пісьменніка, чыю літаратурную спадчыну справядліва называюць мастацкім летапісам беларускай гісторыі, – Уладзіміра Караткевіча.

Як паведамляе газета "Звязда", з 20 па 26 ліпеня ў эфіры Першага нацыянальнага канала Беларускага радыё ўвазе слухачоў будуць прадстаўлены праграмы, якія цесна пераплятаюцца з імем пісьменніка і яго творчасцю. Увогуле, гэта ўнікальны выпадак у шматгадовай гісторыі айчыннага радыё, які сведчыць пра высокую запатрабаванасць творчай спадчыны аўтара.

Агульнае гучанне ўсіх радыёзапісаў (і дакументальных, і мастацкіх) складае больш за 60 гадзін! Першая работа датавана 1959 годам – радыёспектакль “Млын на Сініх Вірах”. 24–26 ліпеня ўвазе слухачоў у “Тэатры Беларускага радыё” будзе прадстаўлены спектакль у трох частках “Нельга забыць” паводле аднайменнага рамана Уладзіміра Караткевіча. Галоўны герой Андрэй Грынкевіч, нашчадак удзельніка паўстання 1863 года, прыязджае на вучобу ў Маскву, дзе сустракаецца з Ірынай Горавай, радавод якой таксама звязаны з тымі гістарычнымі падзеямі ХІХ стагоддзя. Лёс дорыць абаім сапраўднае высокае пачуццё, якое лічаць падарункам нябёсаў… Аўтар інсцэніроўкі для радыё – Тамара Абакумоўская, рэжысёр – Валерый Анісенка, кампазітар – Алег Залётнеў. Запіс з фондаў Беларускага радыё 1985 года.

30 сакавіка ў Гомельскай абласной універсальнай бібліятэцы імя У.І. Леніна адбылося адкрыццё творчага праекта Паўла Сідаровіча (г. Орша) “ЛiтаразнаЎства”, які прысвечаны беларускаму алфавiту і прымеркаваны да 85-годдзя з дня нараджэння беларускага пісьменніка Уладзіміра Караткевіча.

У аснове праекта – чорна-белая плакатная графіка. Для кожнай літары створана кампазіцыя, дзе мастак выкарыстоўвае прадметы і сімвалы, якія пачынаюцца на гэтую літару. Злучным звяном з’яўляецца сімвал чалавека, які мастак жартаўліва назваў Хлопчык. Кожны малюнак суправаджаецца тлумачальным надпісам з ужываннем слоў, якія датычацца дадзенай кампазіцыі.

Серыя налічвае 34 творы, што адпавядае колькасці літар у беларускім алфавiце. Прапанаванай канцэпцыяй мастак не толькі сам разважае пра беларускую мову і беларускую культуру, але і наводзіць на разважанні гледача.

Павел Сідаровіч нарадзіўся ў 1979 годзе. Скончыў Аршанскі механіка-тэхналагічны тэхнікум. З 2005 года сур’ёзна заняўся выяўленчым мастацтвам. Член Аршанскага творчага аб’яднання мастакоў “Рэнесанс”. Удзельнік калектыўных і міжнародных выстаў, аўтар персанальных канцэптуальных праектаў у такіх відах творчасці, як плакатная графіка, трафарэтны жывапіс, графіка алоўкам, арт-аб’екты.

Чытайце таксама:

Згадваем Уладзіміра Караткевіча

Інфармацыйныя рэсурсы

Паслугі