З 16 кастрычніка па 16 лістапада ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка “ААН: дзеля міру і стварэння”, прысвечаная Дню Арганізацыі Аб’яднаных Нацый.

Гэтае свята штогод адзначаецца 24 кастрычніка як дзень нараджэння Арганізацыі Аб’яднаных Нацый. Менавіта ў гэты дзень у 1945 годзе ўступіў у сілу Статут ААН, а ў 1971 годзе Генеральная Асамблея рэкамендавала, каб усе дзяржавы-члены ААН адзначалі яго як дзяржаўнае свята (рэзалюцыя 2782 (XXVI)).

Святкаванне Дня Арганізацыі Аб’яднаных Нацый служыць напамінам пра тое, што планета – наш агульны дом і з дапамогай сусветнага дыялогу і супрацоўніцтва можна вырашыць усе існуючыя праблемы. Традыцыйна ў гэты дзень ва ўсім свеце праводзяцца сустрэчы, дыскусіі і выстаўкі, прысвечаныя мэтам ААН і яе дасягненням.

Арганізацыя Аб’яднаных Нацый з’яўляецца унікальнай міжнароднай арганізацыяй, заснаванай для падтрымання міру і бяспекі ва ўсім свеце, развіцця сяброўскіх адносін паміж краінамі і садзейнічання сацыяльнаму прагрэсу.

Дзейнасць ААН шматбаковая і ахоплівае шырокае кола важных праблем ад устойлівага развіцця і барацьбы з тэрарызмам, заахвочвання дэмакратыі і развіцця сістэмы кіравання да аховы навакольнага асяроддзя і вырашэння глабальных медыцынскіх праблем; ад раззбраення да развіцця вытворчасці прадуктаў харчавання.

У любым кутку свету Арганізацыя Аб’яднаных Нацый з’яўляецца жывым увасабленнем надзеі. Гэта супольнасць, здольная знішчыць насілле і ўкараніць памяркоўнасць; спрыяць развіццю і забяспечыць роўнасць; абараніць правы чалавека і паменшыць маштабы жабрацтва. Працуючы ў поўную сілу, Арганізацыя Аб’яднаных Нацый можа спрыяць ажыццяўленню гэтых высокіх спадзяванняў чалавецтва.

Супрацоўніцтва паміж Рэспублікай Беларусь і Арганізацыяй Аб’яднаных Нацый з’яўляецца адным з прыярытэтных напрамкаў знешнепалітычнай дзейнасці нашай краіны. Беларуская дэлегацыя пастаянна ўдзельнічае ў рэгулярных і спецыяльных сесіях Генеральнай Асамблеі, Эканамічнага і сацыяльнага савета і іншых вядучых органаў ААН. Рэспубліка Беларусь заўсёды імкнулася займаць у рамках ААН актыўную пазіцыю па крытычна важных пытаннях і праблемах міжнароднага парадку дня і, што самае галоўнае, уносіць рэальны ўклад у вырашэнне дадзеных праблем.

Экспазіцыя ўключае наступныя тэматычныя раздзелы:

асноўныя звесткі пра ААН;
правы чалавека;
міжнароднае права
гуманітарныя пытанні;
падтрымка міру і міжнароднай бяспекі;
эканамічнае і сацыяльнае развіццё;
ААН і Рэспубліка Беларусь.

У экспазіцыі прадстаўлена больш за 100 дакументаў з фондаў Нацыянальнай бібліятэкі Беларусі на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.

Выстаўка зацікавіць спецыялістаў у галіне міжнароднага права і міжнародных адносін, палітолагаў, студэнтаў і выкладчыкаў, а таксама ўсіх, хто цікавіцца дзейнасцю ААН.

Карысныя спасылкі

Структура ААН

Асноўныя звесткі