З 14 жніўня па 11 верасня ў аддзеле абслугоўвання афіцыйнымі дакументамі (пам. 207) адкрыта выстаўка “Гандаль людзьмі – глабальны выклік сучаснасці”, прысвечаная Міжнароднаму дню памяці ахвяр гандлю рабамі і яго ліквідацыі.
Гэты Дзень быў абвешчаны Генеральнай канферэнцыяй ЮНЕСКА (рэзалюцыя 29 З/40) на аснове рэкамендацыі, зробленай на 150-й сесіі Выканаўчага савета гэтай арганізацыі ў 1997 годзе. Ён штогод адзначаецца 23 жніўня. Дата была абрана ў знак памяці пра знакамітае паўстанне рабоў, якое ўспыхнула на Гаіці ў 1791 годзе і паклала пачатак працэсу ліквідацыі сістэмы рабства.
Рабства з’яўляецца беспрэцэдэнтнай трагедыяй і адной з самых цёмных старонак чалавечай гісторыі. Нягледзячы на тое, што рабства было адменена і асуджана на міжнародным узроўні, яно па-ранейшаму існуе ў новых формах і закранае мільёны людзей ва ўсім свеце. Па дадзеных ААН, кожны год велізарная колькасць людзей, у асноўным жанчыны і дзеці, становяцца ахвярамі ашуканства і насілля, ператвараюцца ў “жывы тавар” і падвяргаюцца эксплуатацыі. “Новы гандаль рабамі” стаў адной з самых вострых і шырокамаштабных праблем сучаснасці.
Апошнія 15 гадоў тэрмін “гандаль людзьмі” адносіцца да любой дзейнасці, звязанай з прымусам чалавека да працы або затрымліваннем яго ў прымусовым стане. Вылучаюць наступныя асноўныя віды гандлю людзьмі: прымусовая праца, гандаль людзьмі з мэтай сексуальнай эксплуатацыі, праца за даўгі, праца мігрантаў за даўгі, прымусовае хатняе слугаванне, прымусовая дзіцячая праца, гандаль дзецьмі з мэтай сексуальнай эксплуатацыі.
Дакладная колькасць сучасных рабоў у свеце невядомая. 1 чэрвеня 2012 года Міжнародная арганізацыя працы (МАП) апублікавала вынікі другой глабальнай ацэнкі маштабаў прымусовай працы, паводле якіх у сучасным рабстве ў розных краінах знаходзяцца 20,9 мільёна людзей. Кожны год у рабства трапляюць каля 700 тысяч чалавек. Жанчыны і дзяўчынкі складаюць 55 % ахвяр прымусовай працы, а таксама 98 % ахвяр сексуальнай эксплуатацыі.
Гандаль людзьмі з’яўляецца праблемай глабальнага маштабу, якая не прызнае нацыянальных межаў. Такім чынам, нярэдка ён з’яўляецца транснацыянальным злачынствам, аналагічным па сваім характары міжнароднаму гандлю наркотыкамі і незаконнаму абарачэнню зброі. Упраўленне ААН па наркотыках і злачыннасці лічыць, што гандаль людзьмі штогод прыносіць арганізаваным злачынным групоўкам каля 32 мільярдаў долараў. Гэта лічба параўнальная з прыбыткамі ад нелегальнага гандлю наркотыкамі і зброяй.
Таму для барацьбы супраць гандлю людзьмі патрабуюцца транснацыянальныя методыкі, якія выкарыстоўваюць міжнароднае супрацоўніцтва ў формах абмену інфармацыяй і аказання ўзаемнай дапамогі. 30 ліпеня 2010 года сваёй рэзалюцыяй 64/293 Генеральная Асамблея адобрыла Глабальны план дзеянняў ААН па барацьбе супраць гандлю людзьмі, у якім звярнулася да ўсіх адпаведных органаў ААН з рашучым і настойлівым заклікам каардынаваць намаганні для эфектыўнай барацьбы супраць гандлю людзьмі.
Рэспубліка Беларусь увайшла ў лік краін – лідараў барацьбы супраць гандлю людзьмі. Прапанова нашай краіны аб фарміраванні пад эгідай ААН глабальнага руху “Партнёрства супраць рабства і гандлю людзьмі ў XXI стагоддзі” выклікала зацікаўленую рэакцыю з боку ўсіх краін – членаў ААН і шэрагу іншых міжнародных арганізацый.
Экспазіцыя ўключае наступныя тэматычныя раздзелы:
- Вытокі, формы праявы і сутнасць рабства і гандлю рабамі ў глабальным свеце. Сучасныя формы рабства.
- Міжнародна-прававыя аспекты рэгулявання барацьбы супраць рабства і гандлю рабамі.
- Міжнароднае супрацоўніцтва ў сферы барацьбы супраць рабства і гандлю людзьмі.
- Рэспубліка Беларусь супраць трафікінгу.
У экспазіцыі прадстаўлена каля 100 дакументаў на рускай, англійскай, французскай і нямецкай мовах. Вялікую частку экспазіцыі складаюць дакументы міжнародных арганізацый: кнігі, брашуры, мімеаграфаваныя дакументы ААН, перыядычныя выданні.
Выстаўка прызначана для шырокага круга чытачоў, прадстаўнікоў праваахоўных органаў, а таксама для суддзяў, адвакатаў, выкладчыкаў і студэнтаў вышэйшых навучальных устаноў, усіх зацікаўленых станам праблем кіравання працэсамі барацьбы супраць міжнароднага рабства і гандлю рабамі.
Кантактны тэлефон: (8 017) 293 27 34.
Карысныя спасылкі
- Міжнародны дзень памяці пра гандаль рабамі і яго ліквідацыю (23 жніўня)
- Міжнародны дзень памяці ахвяр рабства і трансатлантычнага гандлю рабамі (25 сакавіка)
- Міжнародны дзень барацьбы за адмену рабства (2 снежня)
- Сучасныя формы рабства
- Гандаль людзьмі
- Кампанія Генеральнага сакратара ААН "Разам пакончым з насіллем у адносінах да жанчын"
- Упраўленне Вярхоўнага камісара ААН па правах чалавека (УВКПЧ)
- Спецыяльны дакладчык па пытанні аб гандлі людзьмі, асабліва жанчынамі і дзецьмі
- Спецыяльны дакладчык па пытанні аб гандлі дзецьмі, дзіцячай прастытуцыі і дзіцячай парнаграфіі
Дакументы
- Рашэнне 8.2 150-й сесіі Выканаўчага савета ЮНЕСКА
- Канвенцыі і пагадненні па рабстве
- Глабальны план дзеянняў Арганізацыі Аб’яднаных Нацый па барацьбе супраць гандлю людзьмі [A/RES/64/293]
- Умацаванне каардынацыі дзейнасці Арганізацыі Аб’яднаных Нацый і іншых намаганняў па барацьбе супраць гандлю людзьмі [E/RES/2008/33]
- Канвенцыі і дэкларацыі
 |
 |
 |
 |
 |
 |
 |
 |
 |
