З 18 красавіка да свята Пасхі Нацыянальнай бібліятэкай Беларусі сумесна з Беларускім экзархатам арганізавана тэматычная кніжная выстаўка “Праздников праздник и торжество из торжеств”.
Царкоўны год – гэта чаргаванне будняў і свят. У будні чалавек абавязаны працаваць, святы ж дадзены для таго, каб адчуць разняволенне, узняцца над штодзённай мітуснёй, датыкнуцца да вышэйшага свету.
Рускай праваслаўнай царквой выдзяляюцца дванаццаць самых значных і вялікіх свят, якія адзначаюцца з асаблівай урачыстасцю і па сваёй колькасці называюцца дванадзесятымі Гасподнімі і Багародзічнымі. Навеяны яны памяццю аб галоўных падзеях Евангельскай гісторыі і нясуць жывы ўспамін пра зямное жыццё Збавіцеля і Яго Прачыстай Маці. Асноўнае свята Праваслаўя – Светлае Хрыстовае Уваскрасенне (Пасха) – фармальна ў дванадзесяты цыкл не ўваходзіць, яно вышэй за ўсе святы: «праздников праздник и торжество из торжеств», як спяваецца ў час Пасхальнага набажэнства. Найвялікшае свята Пасхі вылучаецца сярод іншых як вышэйшае праяўленне ўсемагутнасці Хрыста, сцвярджэнне веры і залог нашага ўваскрасення. Пасхальная ўрачыстасць з’яўляецца сэнсавым цэнтрам не толькі царкоўнай абраднасці, але і ўсяго духоўнага жыцця хрысціянства.
Нацыянальная бібліятэка Беларусі віншуе ўсіх з Вялікаднем і прапануе сваім наведвальнікам і чытачам тэматычную кніжную выстаўку, на якой прадстаўлена больш за 150 дакументаў з фондаў бібліятэкі, а таксама каля 100 навінак праваслаўнага кнігавыдання, што пабачылі свет у Выдавецтве Беларускага экзархата. Гісторыя Рускай праваслаўнай царквы, тайны хрышчэння Русі, энцыклапедыя праваслаўных свят, звесткі аб найбольш вядомых праваслаўных святынях (цэрквах і саборах, манастырах, цудатворных іконах, святых мошчах і святых крыніцах), размешчаных на тэрыторыі Беларусі, а таксама за яе межамі, календары і малітвасловы, кнігі па абрадавай кулінарыі, фотаальбомы – усё гэта адлюстравана ў святочнай экспазіцыі. Выклікаюць цікавасць электронныя выданні: унікальны даведнік «Багаслоўская энцыклапедыя» (змяшчае 6 600 артыкулаў), электронны аналаг бібліяграфічнага паказальніка «Гісторыя ранняга хрысціянства» (Нац. б-ка, 2004), які ўключае літаратуру, выдадзеную з 1800 па 1995 гг. на рускай і беларускай мовах.
Экспазіцыя размешчана на 3-м паверсе кальцавога калідора (насупраць Музея кнігі).
Кантактны тэлефон 293-28-86.
 |
 |
 |
 |
 |
 |
