З 8 кастрычніка па 30 лістапада ў зале беларускай літаратуры (пам. 205) праходзіць выстаўка “Споведзь шчырага сэрца”, прысвечаная 70-годдзю беларускага пісьменніка Зіновія Кірылавіча Прыгодзіча.
Матэрыялы выстаўкі падрабязна распавядаюць пра творчы і жыццёвы шлях юбіляра. Першы раздзел экспазіцыі мае назву “Дарога па роднай зямлі”, і гэта невыпадкова, таму што сваімі творамі таленавіты пісьменнік расказвае чытачу пра свой шлях, свае думкі, пра тое, што цікавіць і хвалюе. На выставачных паліцах прадстаўлены кнігі вершаў, апавяданняў, нарысаў, крытычных артыкулаў пра беларускую літаратуру. Сярод іх – першая кніжка аўтара “Добры дзень, сад!” (1974), аповесць “Журавы на Далёкай пойме” (1984), аўтарскія зборнікі “Журба мая светлая” (2002), “Родник у лесных берез” (2011) і інш.
У ліку экспанатаў – кніга З. Прыгодзіча “Постаці: З цэлым народам гутарку весці…” (2011), якая змяшчае 10 творчых партрэтаў знакамітых дзеячаў беларускай культуры. Чытач знойдзе ў кнізе шэраг малавядомых фактаў з іх біяграфій, пазнаёміцца з займальнымі гісторыямі, адкрые для сябе нямала новага і нечаканага.
Працягваюць экспазіцыю творы пісьменніка, выдадзеныя ў калектыўных зборніках і перыядычным друку.
Завяршае выстаўку раздзел “Прыпыніцца, азірнуцца…”, у якім сабраны матэрыялы пра юбіляра. Яны прадстаўлены ў энцыклапедыях, даведачных выданнях, зборніках “Літаратурная карта Берасцейшчыны” (2008), “На ладонях Припяти и Пины” (2004), у шматлікіх часопісах.
Усяго на выстаўцы экспануецца больш за 70 выданняў.
Кантактны тэлефон: (8 017) 293 27 16.