З 25 лютага па 13 сакавіка ў зале беларускай літаратуры (пам. 205) праходзіць кніжная выстаўка "Таленавіты вучоны, карпатлівы даследчык", прысвечаная 75-годдзю беларускага літаратураведа Лідзіі Сямёнаўны Савік.
Матэрыялы экспазіцыі раскрываюць шматгранную літаратуразнаўчую творчасць крытыка, культуролага, акадэміка Міжнароднай АН Еўразіі Л.С. Савік. У першым раздзеле "Даследаванні па беларускай і рускай літаратуры" прадстаўлены кнігі аўтара: "Проблемы современной белорусской “деревенской” прозы" (1977), "Адчуванне часу: тэма вёскі ў сучаснай беларускай прозе" (1981), "Каб не астыла цяпло зямлі" (1984), "Пад мірным небам бацькаўшчыны: нарыс творчасці Б. Сачанкі" (1986), "Адна між замкаў: літаратурны партрэт Вольгі Іпатавай" (2003) і інш.
Працягваюць экспазіцыю публікацыі аўтара, змешчаныя ў часопісах і калектыўных працах, а таксама ўступныя артыкулы, пасляслоўі, каментарыі да выданняў твораў С. Грахоўскага, Б. Мікуліча, А. Асіпенкі, В. Іпатавай, А. Рыбака і інш.
Лідзія Сямёнаўна падрыхтавала тэксты і выдала зборы твораў Я. Нёманскага, Н. Арсенневай, С. Баранавых, Б. Мікуліча і інш.
Асобай увагі заслугоўвае другі раздзел экспазіцыі "Працы, прысвечаныя літаратуры і асобам беларускага замежжа", у якім прадстаўлены кнігі Л. Савік "Вяртанне: Жыццяпіс Б. У. Кіта" (1993), "Космас беларуса: Жыццяпіс Б. У. Кіта, асветніка, вучонага, патрыёта" (1996, 1998), "Пакліканыя: літаратура беларускага замежжа" (2001), "Гісторыя беларускай літаратуры ХХ стагоддзя" ў 4 т., т. 4, кн. 2 (у сааўт.), а таксама артыкулы пра З. і В. Кіпелей, М. Сяднёва, П. Сыча, М. Кавыля, А. Саковіч і інш.
Публікацыі пра жыццё, навуковую і грамадскую дзейнасць Лідзіі Савік прадстаўлены ў раздзеле "Жыццё ў творчай працы".
Экспазіцыя змяшчае больш за 80 дакументаў і фотаздымкі аўтара.
Завяршае экспазіцыю бібліяграфічны спіс прац аўтара.
Кантактны тэлефон: 293-27-16.