З 8 лістапада па 14 снежня ў зале беларускай літаратуры (пам. 205) праходзіць выстаўка “Упоравень з часам”, прымеркаваная да 120-годдзя з дня нараджэння беларускага паэта, празаіка, драматурга, грамадскага і культурнага дзеяча Міхася Чарота.
Лёс Міхася Чарота (Міхася Сямёнавіча Кудзелькі, 1896–1937) у многім тыповы для пакалення літаратараў, якое прыйшло ў беларускую літаратуру ў 1920-я гады. Яго творчасць адлюстравала ў сабе рамантычныя парыванні, супярэчнасці і вялікія ілюзіі свайго часу. Літаратурна-мастацкая дзейнасць М. Чарота дастаткова шматгранная, арыгінальная і поліфанічная. Творы яго сведчаць аб яркім таленце паэта, майстэрстве і паэтычнай культуры.
Выстаўку адкрывае раздзел “Мае песні – мае буры”, у якім шырока прадстаўлена літаратурная спадчына пісьменніка. Наведвальнікі бібліятэкі маюць магчымасць пазнаёміцца са зборамі яго твораў, асобна выдадзенымі кнігамі і творамі ў калектыўных зборніках. Сярод прадстаўленых – “Творы” ў 2-х тамах (1933), “Збор твораў” у 2-х тамах (1958), “Выбраныя вершы і паэмы” (1935), “Выбранае” (2001), паэмы “Босыя на вогнішчы” (1925), “Марына” (1926), “Карчма” (1926), “Беларусь лапцюжная” (1927), зборнікі вершаў “Завіруха” (1929), “Сонечны паход” (1929), зборнік апавяданняў “Веснаход” (1924), “Выбраныя апавяданні” (1926). Як драматург М. Чарот прадстаўлены ў экспазіцыі народнай драмай “На Купалле”, вадэвілем “Мікітаў лапаць” і іншымі п’есамі.
Другі раздзел “З завірухі гадоў” змяшчае творы аўтара, перакладзеныя на рускую (“Босые на пожарище”, “Беларусь лапотная”), украінскую (“Світе, знай...”, “Бунтар”), балгарскую (“Необикновена молба”, “Нероденият”) і іншыя мовы.
Апошні раздзел экспазіцыі “Сын сваёй эпохі” знаёміць з жыццём і творчым шляхам юбіляра з дапамогай энцыклапедый, даведнікаў і літаратурна-крытычных публікацый.
Кантактны тэлефон: (8 017) 293 27 16.
 |
 |
 |
 |
 |
 |
