16 мая ў бібліятэцы адкрылася міжнародная выстаўка сучаснай візуальнай творчасці студэнтаў пад назвай “Грані творчасці”.
Сёлета праект прысвечаны 500-годдзю беларускага кнігадрукавання і праходзіць пад дэвізам “Францыск Скарына. Чалавек дасканалы”. Асоба вядомага асветніка не толькі дасканалая, але і вельмі шматгранная – выдавец, перакладчык, філосаф, багаслоў, прадпрымальнік, педагог, доктар медыцыны, доктар свабодных навук. Выказаць разуменне такой з’явы, як Скарына, у адзіным мастацкім жанры было б досыць складана. Таму стваральнікі творчых работ максімальна выкарыстоўвалі розныя мастацкія прыёмы і прадставілі вялікую разнастайнасць работ – фотаздымкі, жывапіс, графіка, грызайль, летэрынг, сфумата і інш.
“…І людзі да месца, дзе нарадзіліся і ўзгадаваны ў Бозе, вялікую ласку маюць” – гэтая цытата Ф. Скарыны легла ў аснову работ намінацыі “Летэрынг «Я, Францішак, Скарынін сын...»”. Яны літаральна намаляваныя словамі – тэкст і графічныя формы з’яўляюцца мастацкімі аб’ектамі.
Яшчэ адна намінацыя “Буквіца «Друкаванае слова. Вялікія літары»” ўключае ілюстрацыі да прысвечаных Ф. Скарыну твораў вядомых аўтараў.
Фота самай старой кнігі з асабістай бібліятэкі аўтары прадставілі ў намінацыі “Фота-альтэрнат «Крыніца мудрасці, ведаў і навукі, лекі для душы»”.
Намінацыя “Візуальны сэт «Vademecum: там ёсць вялікая тайна»” аб’яднала работы з выявай архітэктурных аб’ектаў і месцаў, звязаных з жыццём і дзейнасцю Скарыны.
У адкрыцці экспазіцыі прынялі ўдзел намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Алесь Суша, намеснік старшыні Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Рэспублікі Беларусь Таццяна Якубовіч, а таксама члены экспертнай групы – дырэктар Выдавецкага дома “Мэджык” Юрый Будзько, дырэктар фотастудыі “Marxstudio” Міхаіл Маруга, шэф-рэдактар часопіса “Taxi” Сяргей Стэльмашонак, загадчык кафедры кiнатэлеаператарства Беларускай дзяржаўнай акадэміі мастацтваў Андрэй Чупрынскі.
Убачыць “Грані творчасці” студэнцкай моладзі можна ў галерэі “Лабірынт” (3-ці паверх) да 10 жніўня 2017 года.
Дата заканчэння работы выстаўкі можа быць зменена.
Тэлефоны для даведак: (8 017) 293 28 23, 266 37 37, 293 28 81.
Е-mail: pr@nlb.by
Чытайце таксама:
I Рэспубліканская выстаўка студэнцкай творчасці “Грані творчасці”