22 чэрвеня, Дзень усенароднай памяці ахвяр Вялікай Айчыннай вайны і генацыду беларускага народа, нагадвае нам пра загінуўшых у баях, закатаваных у фашысцкай няволі, памерлых у тыле ад голаду і нястачы. Мы смуткуем па ўсіх, хто цаной свайго жыцця выканаў святы абавязак, абараняючы ў тыя суровыя гады нашу Айчыну.
Сёння а 12-й гадзіне супрацоўнікі і наведвальнікі ўстановы ўшанавалі памяць кожнага, хто аддаў жыццё ў імя міру на нашай зямлі.
На тэрыторыі Беларусі ў гады Вялікай Айчыннай вайны фашысты стварылі больш за 260 лагераў смерці і месцаў масавага знішчэння людзей. У гэтым трагічным спісе – Трасцянец, Хатынь, Азарычы, Чырвоны Бераг, Дальва, Мінскае гета. Па няпоўных даных, толькі ў лагерах на тэрыторыі Беларусі загінулі каля 1,5 млн чалавек. На тэрыторыі краіны знішчана больш за 9 тыс. населеных пунктаў. Усяго Беларусь страціла кожнага трэцяга свайго жыхара. Памяць пра іх будзе жыць вечна.
Матэрыял пададзены аддзелам сувязей з грамадскасцю.