У Нацыянальнай бібліятэцы Беларусі 6 снежня прайшло пасяджэнне круглага стала “Рэсурсы адкрытага доступу і навуковыя камунікацыі”.
Мерапрыемства было арганізавана Саветам бібліятэк Беларусі па інфармацыйным узаемадзеянні і Нацыянальнай бібліятэкай Беларусі.
У рабоце круглага стала ўзялі ўдзел больш за 50 чалавек: спецыялісты бібліятэк, вучоныя Нацыянальнай акадэміі навук (НАН) Беларусі, навуковыя супрацоўнікі, выкладчыкі і студэнты вышэйшых навучальных устаноў.
З уступным словам да ўдзельнікаў семінара звярнулася начальнік інфармацыйнага цэнтра Нацыянальнай бібліятэкі Беларусі А.А. Шарамецьева. Пад час пасяджэнняў абмяркоўваліся пытанні развіцця руху адкрытага доступу ў рэспубліцы, аналізаваліся вынікі правядзення рэгіянальных кансультацый ЮНЕСКА па праблемах адкрытага доступу да навуковай інфармацыі і даследаванняў.
Пад час правядзення круглага стала з дакладамі і прэзентацыямі выступілі: кіраўнік рабочай групы па адкрытым доступе да навукова-адукацыйных рэсурсаў Савета бібліятэк Беларусі па інфармацыйным узаемадзеянні В.І. Брычкоўскі ("Сайт openaccess.by як сродак прасоўвання ініцыятывы Адкрытага доступу ў Беларусі", "Вынікі рэгіянальных кансультацый ЮНЕСКА па праблемах адкрытага доступу да навуковай інфармацыі і даследаванняў"), магістрант Беларускага дзяржаўнага ўніверсітэта культуры і мастацтваў А.В. Кавалеўскі ("Аналіз магчымасцей выкарыстання электронных выданняў для павышэння эфектыўнасці навуковых камунікацый"), галоўны навуковы супрацоўнік Аб’яднанага інстытута праблем інфарматыкі НАН Беларусі С.Ф. Ліпніцкі ("Магчымасці выкарыстання аўтаматызаванай сістэмы пошуку і рэферыравання навукова-тэхнічнай інфармацыі ў інфармацыйна-аналітычнай рабоце").
Актыўны ўдзел у абмеркаванні праблем адкрытага доступу, закранутых пад час выступленняў, прынялі вучоныя Аб’яднанага інстытута праблем інфарматыкі НАН Беларусі, супрацоўнікі Нацыянальнай бібліятэкі Беларусі, Цэнтральнай навуковай бібліятэкі імя Я. Коласа НАН Беларусі, Прэзідэнцкай бібліятэкі Рэспублікі Беларусь, бібліятэкі Беларускага дзяржаўнага медыцынскага ўніверсітэта, прадстаўнікі Беларускага дзяржаўнага ўніверсітэта інфарматыкі і радыёэлектронікі.
