25 чэрвеня 2008 года ў галерэі «Лабірынт» (3-ці паверх) Нацыянальнай бібліятэкі Беларусі ў рамках праекта «Кропка Адліку» прайшла творчая гасціная «Таемны запал Марыны Цвятаевай», прымеркаваная да 100-годдзя выхаду першага літаратурнага зборніка паэтэсы «Вечерний альбом».
Марына Цвятаева – адна з самых рамантычных і загадкавых постацей 20-га стагоддзя. Уся яе творчасць прасякнута натхнёнай сілай любві да жыцця і рамантычнай «дыялектыкай душы».
У рамках мерапрыемства была прадстаўлена літаратурна-музычная кампазіцыя пра жыццё і творчасць Марыны Цвятаевай, галоўным лейтматывам якой з’яўляецца тэма ахвярнага кахання. Кампазіцыя складзена на аснове вершаў і запісаў паэтэсы ў чарнавых сшытках.
На мерапрыемстве выступіў Генадзь Міхайлавіч Шары – даўні і адданы прыхільнік творчасці Марыны Цвятаевай і сябар яе сям’і. Ён падзяліўся сваімі ўспамінамі аб сустрэчах з А.С.Эфрон, С. Андронікавай, А.І. Цвятаевай.
Наведвальнікі пазнаёміліся з экспазіцыяй кніг, партрэтаў сучаснікаў, рукапісаў, фотаальбома і рарытэтных рэчаў, якія належылі М.Цвятаевай.